1519/2023-2024

Aizawl, the 15th August, 2023: I&PR Minister Pu Lalruatkima chuan vawiin khan India ram zalenna champha vawi 76-na lawmna hun New Delhi Mizoram House tualzawla buatsaih chu a hmanpui. Hnam puanzar pawt pharhin Independence Day 2023 pual thuchah a sawi a ni.

Pu Lalruatkima chuan Independence Day pualin mipuite leh Sawrkar hnuaia thawktute duhsakna chibai a hlan a. India ramin zalenna kum 76 zet  a neih hnuah remna leh muanna tluan tling Mizoram pawhin neiin, State puitling dinhmun kum 38 zet kan lo chuangkai ve ta a, hmasawnna chi hrang hrang Chief Minister Pu Zoramthanga kaihhruai sawrkar hnuaia kan hmu chho mek zel hi a lawmawm takzet a ni, a ti a. Remna leh muanna hlutzia tarlangin, vawngnung reng turin Mizo mipui a sawm a. Sawrkar hnathawkte chu zalenna champha lo thleng pualin taimakna leh inpekna thar nen mipui leh sawrkar tana thawk zel turin a chah bawk.

Delhi Mizoram House-a Independence Day lawmna hunah hian Pu H.Rammawi, Vice Chairman, Mizoram State Planning Board leh Pu Alexander V.Chongthu, Resident Commissioner, Official dangte leh Staff-te an tel a. Hun hlawkthlak tak hman niin, thingpui ruai an kilho nghal bawk.