2221/2023-2024

9.10.2023: I&PR Minister Pu Lalruatkima chuan vawiin chawhma dar 11:00 khan Aizawl Mini-Theatre, Dinthar chu khuallian niin a hawng. Hawnna inkhawmah hian Pu R. Thanglura, Deputy Mayor AMC chu khualzahawm a ni.

Minister chuan shooting locations bu MFF in an siam chu a tlangzarh nghal a. Thu sawiin, mihring hi vawiina kan nunphung leh awm dan te hi kum alo vei chuan a danglam zel thin a, thangtharte hriat atan vawn dan tha ber chu film leh thlalak te hi a ni tiin modern history a film pawimawhna a sawi a. I&PR kaltlanga arts, films leh photography tihhmawnna hrang hrang te sawiin, film chu khawvel huap ah pawh industry lian, a tui mi te tan eizawnna tling a nih theih avangin remchanna sawrkar chuan siam zel a tum thu a sawi a. Vawiina Mini Theatre hawn chuan film lama tui mi te tan hmun tangkai leh, a tul changa inhmuhkhawmna hmun remchang ni thei bawk tur nia a hriat thu sawiin, tangkai taka an chhawr a duhsak thu sawin MFF chu a zelna turah duhsakna a hlan a ni.

Khualzahawm Deputy Mayor Pu R. Thanglura pawhin thu sawiin, thalaite zingah sawrka rhna thawh tum ringhawt a lehkha a zir chuan hlawhchham an tam tur thu a sawi a. Sawrkar hna in mi zawng zawng a dawl zawhloh thu leh, eizawnna tur kawng dang tha tak tak a awm thu a sawi a. Mizo zingah pawh film industry atanga sum lalut an zawm ve zel ta chu lawmawm tiin, an kal zelna turah duhsakna a hlan.

Aizawl Mini Theatre hi NEDP atanga sum hmuh hmanga sak a ni a. Vawiin a hawnna inkhawm hi Mizoram Film Forum (MFF) Chairman Pu Lalawmpuia Khiangte chuan kaihruaiin, Vice Chairman Pu Aldrin Zosangliana chuan kalkhawmte lawmna thu a sawi a. I&PR Director Pu C. Lalnunkima chuan MFF in 'Amawii' film siamtu H. Lalsangzela, Zote entertainment hnenah chawimawina lawmman an pek chu a hlan bawk. I&PR Director hlui Pi Lallianpuiii pawhin he hunah hian a thu a sawi a ni.