2220/2023-2024

Dated Siaha 9th October 2023 : Vawiin khan 'Mizoram Cleanliness Week' kharna leh Mizoram Cleanliness Competition- hawnna chu DRDO Conference Hall, Siahaah neih a ni a, Pi Lalnunmawii, Addl. DC- chu khuallian niin a hmanpui.

Pi. Lalnunmawii chuan Clesnliness Week- khar a nih avangin faina lam ngaihthah palh a hlauhawm tih sawiin, sawrkarin a programme hman hun tura a ruat ve mai a ni, a ti a. Faina hian tawpchin a nei tur a ni lo, tihphung (habit) ah kan neih zawk a tul hle a ti. Department- hotute leh NGO hruaitute chu faina lama tan la uar tur leh an mi leh sa te pawh zirtirna tamzawk pe a faina lama hmasawn tum tlat turin a chah a. Zirtirtuten an zirlai naupangte hnenah faina lam thil zirtir uar a tul hle tih tarlangin nu leh pa te pawhin mahni fate theuh faina leh thianghlimna kawnga chhungkua a bul lo tanpui a, zirtirna tha pe thin turin a ngen nghal bawk.

Mizoram Cleanliness Competition hawnna nei nghalin, Pi Lalnunmawii chuan Mizorama District fai leh thianghlim ber ni turin theihtawp chhuah a tul a tih a sawi a. Siaha khawpui a lo fai a, a lo thianghlim zawk theih nan mitin in mawhphurhna kan nei vek tiin midang kuta dah mai lovin mahni ngei pen chhuak tura in pekna neih a tul hle a ti a. District dangte entawntlak ni turin lungrual takin i thawk tlang ang u tiin kalkhawmte a sawm a ni.

Pi B. Malsawmtluangi (DPO) chuan report pekna neiin Mizoramah kum 1977 atangin 'Faina Hapta' hman tan a ni tiin kum 2017 atang khan UD&PA Department chuan Mizoram khawpui fai intihsiakna a buatsaih tan a ti. Kumin Mizoram khawpui Fai intihsiaknaah hian category hrang hrang siam niin Category I- AMC Ward, Category II- District Headquarters, Category III- Urban Towns bakah Special Award- Fastest movers leh Best Local /Village Council- te tan lawmmman buatsaih sak a ni ang a ti bawk. He intihsiaknaah hian khawlai leh khawdung faina bakah bawlhhlawh thliarhran that te, vantlang zunin leh khawtlang inthiarna thianghlim dan, lui leh luidung tihfai that te, mahni in leh a chhehvel vawn thianghlim te, bawlhhlawh re-use, re-duce, re-cycle kalpui dik te a pawimawh hle a ti. Kumin Mizoram Cleanliness Competition thupui atan hian '3R-Reuse, Reduce,Recycle' thlan a nih thu a sawi a.

Mizoram Cleanliness Competition- a Siaha khawpui dinhmun tlangpui chu hetiang hian a tarlang bawk

2019- 4th position
2010- 7th position
2021- 11th position
2022- 8th position

Kumina lawmman Pakhatna dawngtu hian cheng nuai thum a dawng dawn a, pahnihna in cheng nuai hnih leh pahthumna in cheng nuai khat an dawng dawn bawk a ni.

Vawiin 'Mizoram Cleanliness Week' kharna leh Mizoram Cleanliness Competition- hawnna inkhawm ah hian Pi Lalnunmawii, Addl.DC chuan lawmthu sawina neiin hun a khar a ni.