2222/2023-2024

Dated Aizawl, the 9^th October 2023: Mizo mipuite Mushroom (pâ) khâwia hriatna zau zawk leh zirtirna ṭha kan hmuh theih nan ‘One (1) Week Training on Mushroom Cultivation – A scientific approach’ chu vawiin khan Mushroom Centre, Mizoram Science Technology & Innovation Council (MISTIC) buatsaihin Innovation Facility Centre (IFC), Auditorium-ah Pu Lalmalsawma Pachuau, Secretary, Planning & Programme Implementation Department chuan a hawng. Hawnna programme-ah hian Pu Lalmalsawma Pachuau chuan training-a tel zawng zawngte duhsakna a hlan a. Pa khawia eizawng tur te tan Planning and Programme Implementation Department hnuaia Mizoram Start Up Mission pawhin sumdawnna an kalpui zel dan tura pui turin an inhuam thu a sawi.

Training khuh hawnnaah hian Er. H. Lalsawmliana, Member Secretary & Chief Scientific Officer, MISTIC chuan kal khawmte lawmna thu sawiin, he Training hi Mizo mipuite tana rahbi pawimawh tak a nih ngei a beisei thu a sawi.

Training-ina a tum hrang hrangte sawi zelin Dr Lalchhandami Tochhawng, Scientific Officer and Coordinator chuan Mushroom Centre dinhmun te, he training-in a tum leh funding an hmuh dan leh project chungchang report a pe bawk.

Mushroom Centre, MISTIC hi Department of Biotechnology, Govt. of India project fund hmuh atanga din a ni a. He project-ah hian CSIR-Institute of Himalayan Bioresource Technology, IHBT, Palampur, Himachal Pradesh te nen an thawk dun a ni. CSIR-IHBT hian an mushroom technology chu MISTIC-ah pein, March thla khan an scientist te rawn zinin helaiah training an rawn pe a. Chu mai bakah chuan Mushroom Centre staff te pawh ni 10 chhung May thla khan training in IHBT-ah an kal tawh bawk a ni. Vawiina training programme hawn hi DBT funded project “Inter-institutional programme support on sustainable utilisation of bioresources in Mizoram” tih project kal mek hnuaia, sub project pakhat ‘Captive production of Shiitake and Oyster mushroom and their processing for Vitamin D enrichment’ hnuaia buatsaih a ni.

Training hi Mizo mipuite Mushroom (pâ) khâwia kawng kawhhmuhtu leh eizawnna bul ṭan tura inpuahchahna kawngah hmanraw pawimawh tak a nih ngei theih nana buatsaih a ni. Mushroom (pâ) chi siam aṭanga a thar chhuah thleng chipchiar taka inzirtir tum a ni a.  Training-ah hian Shiitake leh Oyster Mushroom, Vitamin D pai tam, chaw ṭha leh hrisel zawk thlurbing bik a ni ang.

Training atana inziak lut hi an ṭhaṭhnem avangin kar hnih awh turin chhawng hniha ruahman a ni a. A kar khatna hian Ni 9 aṭanga Ni 13 October 2023 leh kar hnihna hian Ni 16 - 19 October 2023 chhung a awh dawn a ni. Training chhuakte aṭang hian Beneficiary thlangin, Mushroom Centre, MISTIC-in enzuipui hna thawk tura ruahhman a ni.

Training hawnnaah hian MISTIC officials te, sawm bikte leh Training tur mi ṭhahnem tak an tel a ni.