Vawiin chawhnu khan Information and Public Relations (I&PR) changtu Minister Pu Lal Thanzara chuan Bawngkawn atanga Zemabawk panna kawng siam that mek chu a hmunah kalin a enfiah a. He hunah hian Minister hi Er. K. Lalsawmvela, CE (NH), I&PR lama hotute, Thuampui khawtlang hruaitute leh kawng siamtu Company lama hotuten an tawiawm a ni.

Pu Lal Thanzara chuan kawngpui siam that mek chu mipuite tana pawimawh tak anih avangin uluk leh chak zawka thawka, kawng tlo leh tha siam turin thawktute chu a hrilh a. Kawng siam thatu Company lam atanga harsatna awm angte pawh ngaihthlak sakin kawng tha leh tlo siam anih theih nana enzuia, vil zui zel a tum thu a hrilh nghal bawk a ni.

Kawng siam that hna hi VRS Company-in a thawk a. January Ni 6, 2017 atang khan thawk tanin vawihnih siam that a ni tawh a, vawi thumna tur thawh leh mek a ni. VRS Company hian Bawngkawn atanga Tuirial panna kawng Kilometre 20 a thui siam that hna a thawk mek a ni.