Nimin khan Lawngtlai District Level Coordination Committee on National Deworming Day chu Lawngtlai Addl DC Pu H.Dolianbuaia hovin a chamber-ah an thu khawm a. Lawngtlai District-a rulhut do beihpui thlak dan tur an sawi ho.

He meeting-ah hian Member Secretary, Lawngtlai CMO Dr Thani Pachuau leh District Programme Manager Lalkhawngaihdawngi Chinzah te chuan kumin February ni 10-a rulhut dona ni hman a nih tawh dan leh a hlawhtlin dan te sawiin, he ni hman thin a nih chhan te an sawi fiah a. Kal khawmte chuan rulhut dona ni hi August ni 10 hian Independence Day parade inbuatsaihna neih mekna hmun CYLA khelmualah hman ni se tiin, he hunah hian Health leh line department lama thawktute, I-Day parade-a tel tur sikul zirtirtute leh zirlaite chu tel thei tura beisei an ni a. Khuallian atan Lawngtlai DC Dr A. Muthamma IAS a ni ang. He ni hi hlawhtling taka hman a nih theih nana hma lakna te vil a, damdawi sem lamte buaipui turin Education department chu ngen leh ruat an ni a. Rulhut chungchang inzirtirna chu a zau thei ang bera puangzar turin ruahman a ni bawk.