Vawiin khan Govt Lawngtlai College Hall-ah Mizoram sawrkar flagship programme thar, New Economic Development Policy (NEDP) peng pawimawh tak Entreprenuership Development Scheme (EDS) hnuaia hma lakna inzirtirna leh Business Plan Contest 2017 kalpui mek chanchin inhrilhfiahna hun (outreach programme) hman a ni.

He hun hi Lawngtlai Addl DC Pu H.Dolianbuaia MCS chuan a kaihruai a. Tunlai khawvelah hlawhtling tur chuan thiamna tak tak neih a ngai tawh a, hma thar lakna tur ngaihtuah chhuak thiam leh harsatna tawn ngam mi nih a tul, a ti a. Mizoram hmasawn nan chuan pawisa aiin hna thawh a pawimawh zawk a ni, a ti.

He hunah hian EDS Master Trainer Dr Vanlalthlana chuan Mizoram sawrkarin NEDP hnuaia EDS a duan chhuah dan leh hma lakna tur hma chhawp hrang hrangte sawi fiahin, Mizoram hmasawnna tur kailawn pawimawh tak a nih thu a sawi a. Mizoram chu hlawhtling tura din chhuah theihna hmun leh leilung boruak tha a nih thu sawiin, mi tih bak va ti peihte tan chuan hlawhtlin a har lo hle a ni, a ti a. Sumdawnna kawnga hlawhtling leh dingchang tura thil pawimawh hrang hrang te, EDS hnuaia a ngaihna hriate tana hamthatna hrang hrang awm thei tur te a sawi fiah bawk.

Indian Institute of Management Calcutta Innovation Park (IIMCIP) Mizoram Local Team Coordinator Pi Lalrinngheti Sangsiama chuan EDS hnuaia Business Plan Contest (Mizoram Kailawn) 2017 kalpui mek chungchang leh tel ve tura tih dan tur te a sawi fiah a. Mi la tih ngai loh leh tih tawh hnu pawh, hlawhtlinpui thama hma lak dan tur hriate chu he contest-ah hian tel ve ngei tura sawmin, Govt Lawngtlai College zirlai pahnih chu ambassador atan an ruat nghal a. Zawhna leh chhanna hun  hman a nih hnuah Lawngtlai District Industries Centre-a Functional Manager Pu C.Dokulha’n lawm thu sawiin hun khar a ni.

Mizoram Business Plan Contest 2017 hi sumdawnna kawng thar ruahmanna tha neite inelna tur a ni a. Hetah hian hma lakna hlawk leh awmze nei tura ngaihte ruahmanna theh lutin, chu chu mi thiamte’n a tha tha thlang chhuakin, sawrkar chuan an bul tanna tur lawmman a siamsak dawn a ni. Hemia tel duh leh ruahmanna theh lut ve duh tan www.mizoramkailawn.org emaw www.mizoramkailawn.com emawah internet kal tlanga inziah luh theih a ni a. Ruahmanna hi August ni 31, 2017 thleng theh luh theih niin, mi thiamte’n round 2-a an thlit fim hnuah, final leh Entrepreneurship Summit chu October ni 10, 2017-ah neih tur a ni.

Vawiina outreach programme-ah hian college zirtirtute leh zirlaite, Lawngtlaia mahni remhriatna hmanga sumdawnna kalpui tawh leh bul tan chho mekte bakah, official pawimawh eng emaw zat an tel a ni.