Vawiin khan I&PR Minister Pu Lal Thanzara chuan Govt. Democratic High School, Khumtung Golden Jubilee lawmnaah Khuallian niin a hmanpui a, he hunah hian bialtu MLA Er. Lalrinawma chu Khual Zahawm niin Pu Lawmawma, DEO Serchhip leh National Awardee, Headmaster hlui ni bawk, Pu Remsiama te an tel a ni.

Minister Pu Lal Thanzara chuan Govt. Democratic High School in Golden Jubilee hmang thei a an awm chu lawmpuina leh duhsakna a hlan a. Pu Lal Thanzara chuan ram leh hnam hmasawmna kailawn pawimawh berte zinga pakhat chu zirna hi a ni a, chumi ti hlawhtling tur chuan zirtirtute leh zirlaite hian mawhphurna sang tak in nei a, chumi atana kum 50 chhung rim taka in thawhnate hian malsawmna tam tak a ken ngei ka beisei tlat a ni, a ti. Hlawhtlinna chang tur chuan taimakna leh tih takzet a beihna a pawimawh a ni, a ti a, tunlai khawvel finna in a rawn hrin chhuah, sualna lama rilru la peng thei thil chi hrang hrang, zirna atana tangkailo, Computer leh mobile games leh social media te nena tul lo a in hnuk hnawk lo turin ka chah duh che u a ni, a ti bawk. Pu Lal Thanzara chuan Mizoram in a chhe zawngin "Ber" nihna kan nei chho zela, Vaihlo leh a kaihhnawih vanga cancer vei tamna ber, Natna enkawl khirh tak AIDS vei tamna ber te kan ni a, heng avang hian kan ram leh hnam siam tha tur hian tuna zirlai leh zirtirtute hi in pawimawh hle a ni, a ti.

Bialtu MLA Er. Lalrinawma chuan zirlaite chu an zirchhuahna leh an zirtirtute aiin an mahni ah tum ruhna leh taimakna an neih tlat a pawimawh a ni, a ti a, pawl sawn nan chauh a Pass mark hmuh satliah hian awmzia a nei tawh lo, a ti a, ram leh hnam in a chhawr tlak khawp thiamna zir chhuak theuh turin a fuih.  Pu Lawmawma, DEO, Serchhip pawh in zirtirtute chu naupangte tan kawng engkima entawn tlaka awm turin a chah bawk.

Govt. Democratic High School Golden Jubilee lawnna hun hi Pu H. Lalthakima'n a kaihruaia, Monument hawnna te neih niin Jubilee souvenir te tlangzarh a ni a, Jubilee Dar vawi 50 vuak a ni bawk. He hunah hian zaithiam hrang hrangte zai ngaihthlak niin chaw hlui kil ho nghal a ni.