Vawiin chawhnu khan Lunglei DC Conference Hall-ah Additional DC Pu Benjamin Lalzama kaihhruaina hnuaiah Dt 26.04.2018 a Lunglei khaw chhunga Multi State Mock Exercise on Earthquake Disaster neih dan tur relin meeting neih a ni. He hunah hian sawrkar Department hrang hrang hotute bakah 1st AR Battalion, 61st Battalion BSF, Lunglei Adventure Club, Lunglei Photographers Association, Civil Hospital, Christian Hospital Serkawn aiawhte, YMA hruaitute leh veng hrang hrang khawtlang hruaitu VC-te an tel.
Meeting kaihruaitu Pu Benjamin Lalzama chuan Dt 26.04.2018 a Multi State Mega Mock Drill on Earthquake Disaster chu National Disaster Management Authority leh State Disaster Management Authority te tangkawpin ruahmanna an siam anga neih tur a nih thu a sawi a. Mega Mock Drill-ah hian chhiatrupna thlena chet lak dan tur lem channa Lunglei khawpui chhung hmun panga (5) ah neih a nih tur thu sawiin khuarel chhiatna in engtiklai pawhin min chim thut theih avangin inbuatsaihna leh kan mawhphurna theuh kan hriat chian a tul a ni, a ti.
He hunah hian Pi Chuaupari Pachuau, District Organizer, DM&R Lunglei chuan Powerpoint presentation hmangin he lem channa a inpuahchah dan leh a kalpui dan tur ruahmanna siam Scenario for Mock Drill Exercise’ sawifiahna hun a hmang bawk.
Vawiin meeting-ah hian Dt 26.04.2018 a Lunglei khawpuia Mega Mock Drill neihna hmun tur pang ate thlan fel niin hengte hi Sobji Market area, Jedaz Petrol Pump Area, Zotlang, Government Higher Secondary School, Chanmari, Bazar Veng Main Road, leh Venglai to Electric Veng Road (near Apex bank) te an ni. Heng hmun thlanchhuah ah te hian Mega Mock Drill-a mawhphurna hrang hrang te ruahman fel a ni a. District Emergency Operation Centre (DEOC) ah DC Conference Hall chu hman a nih dawn bakah Staging area ah District Transport Office (DTO) kawtzawl chu ruahman a ni bawk.
