Vawiin chawhma dar 11 khan I&PR Conference Hall-ah Mizoram Information Service Association (MISA)-te chuan Annual Conference an hmang a. I&PR Minister Pu Lal Thanzara leh I&PR Secretary Pu B. Lalthanliana te’n an hmanpui.

Khuallian, I&PR Minister Pu Lal Thanzara chuan Information Officer-te chu sawrkar leh mipui inpawhna hmanrua, sawrkar hmalakna leh hnathawhte mipuite hrilhhretu ber in ni, a ti a. Minister chuan Democracy rama awm kan nih avangin sawrkarna changtu apiang thawhpui hi sawrkar hnathawktute mawhphurhna a ni a, hemi kawngah hian IPRO-te in fakawm takzet a ni, a ti bawk. IPRO-te harsatna hrang hrang pawh a hriatpui thu leh a tul anga lirthei leh hmanraw thar tha zawk hmanga thuam kawngah pawh puih a inhuam thu Khuallian chuan a sawi bawk. Minister chuan I&PR department-in NLUP hlawhtlinna pholan kawnga a hmalakna chu chhuanawm a tih thu leh hemi atana thawktute inpeknaah lawmthu a sawi a. Mizoram sawrkar pawhin sawrkar hmalakna puanzar kawnga chak zawka hmalak a tum tih sawiin Chief Secretary hova sawrkar Department hrang hrang hotute thukhawm pawhin hmalakna zau zawk leh mumal zawka kalpui a remtih tawh thu Minister chuan a tarlang bawk. Journalist Association, Mizoram Film Development Society, Mizoram Art Development Society, Mizo Photographers' Society, leh a pawl dangte nen a I&PR Department-in thawhhona tha tak a nei thei chu lawmawm a tih thu a sawi bawk.

Khualzahawm I&PR Secretary Pu B. Lalthanliana pawhin thusawiin I&PR Department mawhphurhna chu mipuite hnena sawrkar hmalakna puanzarte leh Mipui leh sawrkar inlaichinna tha siamte a nih thu a sawi a. Sawrkar hmalakna leh hnathawhte leh a hlawhtlinna zau taka mipui hriattir chu sawrkar in a tum thu sawiin officer kalkhawmte chu sawrkar hnathawh tih puitlin kawnga tan la sauh sauh turin a sawm bawk. Sawrkar hnathawkte tan dan hriat a pawimawh thu sawiin khualzahawm chuan Officer kalkhawmte chu hotute kawng dik kawhhmun thei tura intuaihriam thin turin a chah bawk.

MISA Annual Confrence hi hun hnihah then niin hun khatna chu an pawl Vice President Pu David L. Thangliana’n a kaihruai a. MISA General Secretary Pi B. Lianthangpuii chuan lawmthu sawiin hun a khar a ni. Chawhnu lamah rorel inkhawm neih niin tangkai zawka hna an thawh theih nan hmalak tulte sawi ho in hun an hmang a ni.