Nizan khan I&PR Minister Pu Lal Thanzara chuan Mizo Department, Pachhunga University College (PUC) leh Art & Culture Department , Govt. of Mizoram tangdunin an buatsaih Mizo Cultural Studies & Performing Arts Certificate Cum Show Programme chu PUC  Seminar Hall-ah hmanpuiin, khuallian a ni.

Khuallian chuan thusawiin course hlu leh tangkai tur buatsaihna chang hria Principal leh zirtirtute chungah lawmthu a sawi a, Pathian hian khawvela hnam hrang hrangte hi ‘culture’ hrang neiin a din a, Mizote pawh hi hnam tlemte ni mah ila, hnam lam te, hnam tihdan phung te, ei leh in leh inrelbawl dan thlengin khawvel dang te neih ve loh kan nei, a ti a. Thil tak tak kalpui tur chuan Zirna In atanga hmalak a tul zel a, chu chuan a bul thut atangin a sawhnghet a, thangthar zel rilru-ah a tuh nghet bik a ni, tiin a sawi a. Mizorama college tha ber pawla hetiang course thar hawn a ni thei hi lawmawm a ti bawk a ni. Zirlai chhuak thar mi 23 te pawhin hnam hmangaihna rilru pu chunga, thiamna leh theihna an neih te chu hmang zel turin duhsakna a hlan a ni.

He hunah hian Hlado Chham, Suarpui (Lam), Sarlamkai, Ainawn (Lam), Nature Mime (Chetzia chauha lantir) te ropui taka phochhuah a ni a. Heng Suarpui leh Ainawn te hi Chhawkhlei Cultural Club te’n entirin, zirlai leh sawmbik mipui chuan an hlut hle a ni.

Certificate Course atan hian tlai Dar 4-5 inkarah class lak thin a ni a, Zirtawpni leh Inrinni-ah Art & Culture Department Instructor ten hnam lam chi hrang hrang an zirtir thin a ni. He certificate course hi Mizoram University pawhin a pawmpui  a,  PUC hnuaia department hrang hrang zirlai 32 ten zirin, a tawp thlenga zirchhuak chu 23 niin, Grade A-ah an pass vek a ni. Zirlaite hian sponsor tu neiin, a hautaklo zawnga course zirna hi buatsaih a ni a. Zirlai te hian India ram hmun hrang hrang Mysore, Hyderbad leh Manipur-ah te hnam lam chi hrang hrangte an lo entir tawh bawk a ni.

Programme ah hian zirlai nu leh pa, zirtirtu leh NGO lama hruaitute, Art & Culture lama tui mi tak tak te an tel a ni.

Attachment

  • Loading attachment...