Nimin khan Mizoram Youth Commission(MYC) Chairman Pu Joseph Lalhimpuia leh Pu Raj Tiwari, Manager, Exams Bussiness Development, British Council, East India chu an inkawm a; India ram pawna lehkha zir chhunzawm tum ten an paltlang thin, International English Language Testing System (IELTS) Examination chu Aizawlah exam a nih theih nan Exam Centre din dan tur an ruahman a ni.
MYC Chairman Pu Joseph Lalhimpuia chuan thalaite khawvel zauh sak tuma sawrkar hmalakna kal zelah rampawna lehkha zir zawm duh te tan remchanna siam sak tumin sawrkarin hma a la zel tih a sawi a, " He mi kaihhnawihah hian MYC chuan Bristish Council official te pawh Mizoramah a chah chho a, IELTS Centre pawh India hmarchhak a a hmasa pawl ni turin kan neih phah dawn a ni", a ti. Ram pawna lehkha zir chhunzawm leh hnathawh duh tana paltlang ngei ngei ngai, chhawr tlaka saptawng tawng thiam leh thiamloh exam kaltlanga enchianna, IELTS Exam Centre, sum tam tak senga phai lama kal lo in Mizoramah a awm ve leh thei tur chu thalaite tan thil lawmawm tak a nih thu a sawi a. ‘August 2, 2018 hian MYC Centre, Aizawl-ah India ram pawna lehkhazir duh leh hnathawk duhte tan IELTS Examination buatsaih nghal a niang,” ati.
MYC Centre, Aizawla IELTS Examination hmachhawn tur hian MYC chuan mi 85 IELTS Coaching Class kalpuilai a nei mek a ni. Tin, mahnia exam inhuamte tan pawh IELTS MYC Coaching Class kalpuina leh Mizoram tana Examination Registration Portal tihtheihna, Spotlight Coaching Academy, Saron Veng, Aizawlah August 2, 2018-a IELTS exam hmachhawn duhte tan registration tih theih a ni tawh bawk a ni. Saptawng hmanna ramah hnathawh nan leh lehkhazir chhunzawm nan IELTS pal tlang hi a ngai a, USA, UK, Australia, Canada, New Zealand, Germany leh khawvel ram hranghrang ram 140 chuangin an pawm a; khawvel ram hrang hranga Universitiy 10000 leh School leh College 3500 chuangin an pawm bawk a ni.
