4122/2023-2024

Aizawl, the 11th March, 2024: Tukin khan I&PR Minister Dr. Vanlalthlana chuan Information & Public Relations Department-in a buatsaih, Press Tour of Tripura a kal chhuak tur Journalist 15 leh Official 2 te chu I&PR Office kawt atangin a vailiam.

Press Tour of Tripura-ah hian Tour Leader chu Pu Malsawmsanga, Dy. Director, I&PR Department niin Pu Lalrinmawia Sailo, Gen. Secretary, MJA Gen Hqrs. chu Asst Leader a ni thung. He press Tour atan hian District hrang hrang atangin MJA member thlanchhuah niin an vaiin mi 15 an tel thei a, I&PR Department atangin Officer pakhat leh Staff pakhat an tel bawk a ni.

Press Tour-a fehchhuak turte pual hian I&PR Director Room-ah briefing neih hmasak a ni a. He hunah hian I&PR Minister Dr. Vanlalthlana chuan Press Tour buatsaih a ni leh thei ta chu lawmawm a tih thu a sawi a. Press Tour chu tangkai taka hman theih a ni tih sawiin,  thenawm state-a hmalakna entawntlak deuhte chu uluk taka chik a, ngun taka zu zirchiang turin MJA member-te chu a chah a. Tour member-te chu hun hlimawm tak hmang tura duhsakna hlanin, mipuitling tak tak feh chhuak an nih anga Mizoram tihmingthatu nih tum turin a chah tel bawk.

Tripura Tour atana inhrilhhriatna hun tawi hman hi Pu C. Lalnunkima, Director, I&PR Department-in a kaihruai a. He hunah hian MJA General Hqrs. President Pu C. Lalrambuatsaiha'n fuihna thu a sawi a. Tour Leader Pu Malsawmsanga, Dy. Director, I&PR Department-in report a pek dan chuan Press Tour of Tripura neih tur atan hian Information & Cultural Affairs (ICA) Department, Tripura chu I&PR Department Mizoram hotute'n an dawr a; hemi bawhzui hian ICA, Tripura chuan Mizoram atanga Press Tour kalte tan programme hman dan tur ruahmanna a lo duang a ni. Mizoram Press Tour team hi ICA, Tripura Senior Officer 3 leh Staff 2 te'n an cham chhung zawngin an lo buaipui dawn a ni.

Programme duan lawk ang chuan naktuk March ni 12, 2024 leh naktip March ni 13, 2024 hian Agartala khawpui leh a chhehvela Tripura sawrkar hmalakna liantham deuh leh hmasawnna ruhrel lian deuh deuhte tlawha zirchianna neih tum a ni.

Press Tour of Tripura vailiam program tawi hmanah hian Pi K. Vanlalsangi, Joint Director, I&PR Department leh MJA General Hqrs. hotute an tel a ni.