3700/2023-2024

Lawngtlai dated 7th February 2024: Nimin chawhnu khan Department of Information & Public Relations Minister Dr.Vanlalthlana chuan MJA Lawngtlai District Annual Conference, Lawngtlai Press Club-ah a hmanpui a. Pu ZD Dengngura, Editor, Phawngpui Express chuan hun kaihhruaiin Dr. Lorrain Lalpekliana Chinzah, Adviser to Chief Minister leh Pu T.Lalhlimpuia, MLA-ten an telpui a ni.

I&PR Minister Dr.Vanlalthlana chuan Media thangzel ah Journalist ten nasa zawk a an beih a ngai tih sawiin, thuthmun atanga News zawng khawm lova, khawtlang leh ram siamthat nan chhungril zawk luhchilh a, chanchinthar tangkai haichhuah kawng ah tan la turin a fuih a, Chanchinbumite chuan a tul apiang ah Sawrkar hmalaknate chu umzui a, chhui a, kal sualna lak a venpuitu ni turin a sawm.

Minister chuan Sawrkar hmasain Journalist Pension a lo ruahman chu chak tak a bawhzui a nih thu sawiin Sawrkar hmasain thil tha chhunzawm tlak a hnutchhiahte chu theihtawp chhuah a bawhzui zel an tum thu a sawi.

Dr.Vanlalthlana chuan pung tam zawk a pawisa dahna lem hmang a inbumna a hluar thu sawiin, khawpui lam aiin thingtlang lam ah bum theih tur an zawng nasa a, rim tak a an thawhchhuah pung tam zawk itna vanga sum dah punna lem hmang a bumna tawk an awm chho deuh reng a, mipui lam fimkhur a ngaih thu a sawi a. Chamchibumite chu hetiang inbumna lak a fimkhur tur a mipui hnen ah zirtirna pe tam turin a chah bawk a ni.

I&PR Minister chuan Sawrkar hnuai a hmathatna hrang hrang awmte chu mipuite hnen a hrilhhriat a pawimawh thu sawiin hemi kawngah hian Lawngtlai MJA-te chu tan la turin a fuih a. Chanchinbu leh Media platform hrang hrangte kaltlang a mipuite hnen a thu dik chauh kan thlen chuan mipui tan thuthlukna dik siam a awl tur thu a sawi bawk a ni.

Dr. Lorrain Lalpekliana Chinzah, Adviser to Chief Minister chuan chinchinbumite chu Sawrkar leh mipui thlunzawmtu pawimawh tak an nih angin thlei bik nei lova huaisen tak a thu dik puan chhuah hna kalpui chhunzawm zel turin a chah a. Pu T.Lalhlimpuia, MLA chuan MJA member-te chu Sawrkar langtlang siamna kawngah leh a tul hun a siamthatna kawngah thurawn petu leh khalh ngiltu ni zel turin a chah bawk a ni.

District MJA President Pu Lalngheta Ralte chuan Mizoram Journlist-te kawng hrang hranga dawmkan an mamawh zia sawiin Sawrkarin Hand Holding Policy a kalpui tur ah pawh Journalist te a huam tel ngei an beisei thu a sawi a. Awmze nei zawk a chanchinbumite hmakhua ngai a sawrkarin ruahmanna a siam a tul thu a sawi bawk a ni.

Lawngtlai District MJA Annual conference ah hian chawhma lam ah rorelna neiin, thuthlukna pahnih siam a ni a. Pakhatna chu Mizoram Sawrkar hian Advertisemnet Rules a hmanlai hi ennawn se, I&PR Department hian, State Sawrkar hnuaia Department zawng zawng ten an hman theih turin Advertisemnt Fund hi Budget hran ah dah turin thuneituten hma la se tih a ni a.

Pahnihna chu Mizoram chhimlam District ah kawlphetha lakna chhe zing lutuk hian mipui tawrhna a thlen nasat avangin Sawrkar in a theih ang a rangin Mizoram chhimlamin kawlphetha mumal zawk a hmuh theihna tur a hma lak ni se tih a ni.

MJA Lawngtlai Annual Conference ah hian IPR Minister hi DIPRO Lawngtlai leh LADC a I&PRO bak ah sawm bik ten an tawiawm a ni.