3050/2024-2025

Aizawl, the 18^th November 2024: Vawiin chawhma khan I&PR Auditorium-ah National Press day 2024, kumtin 16^th November a hman thin chu remchan zawkna avangin hman a ni a. He hun hi I&PR Minister Dr Vanlalthlana chuan khuallian niin a hman pui a. Kumin National Press Day Program-ah hian I&PR Minister chuan Mizoram Sawrkarin Journalist pension a duan thar chu tlangzarh nghalin Journalist Pensioner mi 8 (pariat) hnenah Journalist Pension Book a hlan nghal bawk a ni.

National Press Day 2024 puala thuchah sawiin I&PR Minister Dr Vanlalthlana chuan tunlai khawvelah Technology-ah hmasawnna nasa tak awm mahse Journalist pawimawhna leh mawhphurhna a tlahniam chuang lova. Amaherawh chu, khawvel hmasawn zel leh thiamna thar mil turin journalist te chu an intahhriam chhunzawm reng a ngai thung a ti. 

Ram hmasawnna kawngah ram hruaitute remhriatna leh thawhrimna a pawimawh rualin a nawrkal turin ram mipuite tuihalna leh rualawhnate a pawimawh tak zeta. Mipuite rilru sukthlek dan her rem tur leh khawvel tukverha dahchhuah tira, hmasawnna kawnga tuihalna leh rualawhna dik an neih theihna turin Journalist ten mawhphurhna leh tihtur pawimawh tak an nei tih a sawi. Thil chik, dil chhut leh hnuchhui kawngah Journalist te chu tan la chhunzawm zel turin a chah a. RTI hmang tangkai chhunzawm turin a chah tel bawk.

Misinformation – thuchhuah dik tawk lo leh Disinformation – tum reng vanga thudik lo dik anga chhuah luih chungchang leh nghawng tha lo a neih chungchang te sawiin MJA te chu thudik leh tan lam neilo, huai taka an thil hriat te chhuah zel tur leh ram tana an mawhphurhna   pawimawh tak te hre reng turin a chah bawk a ni. 

Mizoram Journalist Pension Scheme 2023 hi Mizoram sawrkar chuan Gazette kaltlangin 05.10.2023 khan a ti chhuak a. He pension scheme hnuaiah hian India khua leh tui dik tak, Mizorama chhung mi leh sa, Journalist hna  kum 30 tal thawk tawh chuan kum 60 a tlin veleh, ama duh thu angin Journalist Pension hi a dil thei a ni. Mizoram Journalist Pension Scheme hnuaiah hian Pensioner hian Rs 8500/- thlatin,  thlabi hlawh a la thei a ni.

National Press Day 2024 puala Program hi Pu C.Lalnunkima, Director, I&PR chuan a kaihruai a. He hunah hian Pu C.Lalrambuatsaiha, President, MJA hnen atangin Nation Press day 2024 puala thupui.”Changing Nature of Press” tih hmangin infuihthar lehna thuchah tha tak ngaihthlak a ni a. Jounalist kalkhawmte hmaah Dr David C.Vanlalfakawma, Department of Forestry, MZU chuan “ Journalism in the face of the environmental crisis”, tih thupui hmangin kan chhehvel borual, leilung, nungcha leh ramngaw chereu mek zelah Journalist te hma an lak a tul zia thiam takin a sawifiah bawk a. Pi Mina Zoliani, Joint Director, I&PR chuan lawmthu sawiin huntawp a khar thung a ni.