3051/2024-2025

Dated Kolasib the 18th November 2024 : Vawiin chawhma dar 10:30 khan Mizoram Journalists' Association (MJA), Kolasib District-te chuan Kolasib Press Club-ah 'National Press Day' an hmang a. Kolasib Deputy Commissioner Pu Robert C. Lalhmangaiha chuan he hun hi khuallian niin a hmanpui.

He hun hi MJA Kolasib District vice President Pu C Zomuanpuia chuan kaihruaiin, inlawmna thu a sawi bakah, National Press Day ṭobul leh MJA Kolasib District te'n National Press Day an lo hman tawh ṭhin dan a tarlang a. MJA Kolasib District President Pu Andrew Vanlalauva chuan kumin National Press Day thupui atana thlan, "Changing the Nature of the Press" tih hmangin thu a sawi a. Khawvel thiamna leh changkanna thang chho zelah Chanchinthar lakkhawm leh thehdarh kawnga hmasawnna leh insiamrem a ngaihna laite sawina hun a hmang.

Khuallian, Kolasib Deputy Commissioner Pu Robert C. Lalhmangaih chuan  National Press Day hman a ni leh thei chu lawmawm a tih thu a sawi a. Journalist-te chu Sawrkar leh mipuite inkara palai hna thawktu pawimawh tak an nih thu  sawiin, ram kalsiam hna thawh kawngah  Chanchinthar lakhawmtu Journalist-te an pawimawh takzet a ni, a ti a. Khawvel thang chho zelah inbiakpawhna leh Social Media chak tak karah Chanchinthar rintlak tak hriat a phochhuah a nih theihnan mipuite’n Journalist-te thuchhuak an ngaihchang reng thu a sawi a. Kolasib DC chuan he huna Journalist kalkhawmte chu an hnathawhna kawng engkimah dikna leh huaisenna nen, ‘a chhe lai siamthatu' ni thei turin fuihna thu a chah bawk a ni.

National Press Day hi November ni 16, 1966-a din, ram pum huapa media-te thlung khawmtu Press Council of India (PCI) din ni pualin kum tin hman ṭhin a ni a. Kum tin thupui neiin, Media-te ṭhan chhoh zel dan tur leh hmasawnna tur te, ram rawngbawlna kawnga media-te'n hlawk zawka tha an thawh theih dan tur te zir ho nan hman ṭhin a ni. 

National Press Day Kolasib a hmannaah hian Pu Lalnunmawia, Treasurer MJA Kolasib District chuan lawmthu sawiin he hun hi khar a. Vawiin hunah hian Kolasib District huamchhunga MJA memberte an kalkhawm tha hle.