Pu Lalruatkima, I&PR Minister chuan nizan dar 8:00 khan Central YMA Hall, Tuikhuahtlang, Aizawl-ah Central YMA leh Mizoram Football Association tangkawp buatsaih “Suzuki Gixxer 250, 20th Inter-branch YMA Football Tournament, 2019” kick-off programme a hmanpui.

Kick-off programme hmanpuitu khuallian Pu Lalruatkima chuan Inter-Branch YMA Football Tournament chu kum 1985 a khelh tan anih thu a sawi a, a tirah jubilee lawman anga kalpui a ni a, a hnu ah huap zau zawka kalpui niin mizo thalaite talent haichhuahna atan hman chhunzawm a ni a ti. Khuallian chuan mizo football khel thiam S. Malsawmtluanga hming sawilangin Chhinga Veng atanga CYMA Inter-branch Football Tournament a hmingchher anih thu leh Mizo football bung thar min kaipui a, a sulsutu a ni a, CYMA football tournament rahchhuah pawimawh ber pakhat chu Mizo tlangval te football a eizawnga India rama an inzarpharh ta hi a ni a ti a. University zirlaite pawhin research tihnan CYMA Tournament hi an rawn hmang ta hial a ni a ti.

Khuallian chuan kan ram leh khawtlang dinhmun chhiatzia, kan thalaite fel lohzia nasa takin kan tlangaupui thin a, mahse uluk taka chhut chuan a thalo leh fello hi chu za ah pahnih vel bak a nilo, kan thatlohna aiin kan thatna hmuh tur a tam a, a fello leh a chhe lai hlir sawilo hian a tha lai sawi i uar tawh zawk ang u a ti a, hei hian a eng zawngin thil min thlir tir thei ang a hma kan sawn pui zawk ang a ti a ni. Inelna beitu tur YMA member inkheltur te pawh an hmalam kawngzawh zel tur atana hun tha hawn sak theitu tur ani tih hria a rilru thianghlim tak nen theihtawp chhuah a bei turin a chah a, tournament sponsor tu LBS Suzuki te inhawnna leh inpekna avangin lawmthu a sawi bawk a ni.

Khuallian hian thu a sawi zawh ah Tournament official match ball pet in Tournament a kick-off a ni.

Nizan kick-off programme hi Pu Peter Chhakchhuak, Organising Committee Chairman in a kaihruai a, Pu R. Lalrinmawia, Sports Secretary, CYMA in inhmelhriattirna hun leh thu puan tur pawimawh te a sawi a, Tournamnet sponsor tu LBS Suzuki proprietor Pu Joseph Lalthanpuia’n Prospectus leh Fixtures te a tlangzarh a ni.

Central YMA leh Mizoram Football Association ten an buatsaih Inter-branch YMA Football Tournament vawi 20-na hi “Suzuki 250, 20th Inter-branch YMA Football Tournament, 2019” tih a ni a, YMA Branch/Group hrang hrang aiawh Team 110 telin heng Team te hi Group li ah then an ni. Group A ah hian Team 27 awmin Group match zawng zawng hi RG Stadium, Mualpuiah khelh ani ang a, Group B ah Team 27 awmin Ramhlun Sports Complex-ah an inkhel ang, Group C ah Team 28 awmin Republic Veng Field ah an inkhel ang a, Group D ah Team 28 awmin AR Ground (Sipai Lammual) ah an inkhel ang. Tournament hi July ni 1, 2019 atanga khelh tan tur a ni a, Group phase atangin knock out match a khelh tur a ni a, Group tin a semi final lut te hi Round of 16 an lut nghal dawn a, Round of 16 atang hian Final thleng AR Lammualah khelh chhunzawm ani ang.