Mizoram Upa Pawl (MUP) Zarkawt Unit Building thar sak tur lungphum chu tukin zing khan Information and Public Relations (I&PR) Minister  Pu Lal Thanzara, bialtu MLA nibawk chuan a phum. 

Pu Lal Thanzara chuan  Building thar sa thei tura Zarkawt MUP  Unit-te thawhrimna chu fakawm a tih thu a sawi a. Mizoram Upa Pawl member te chu khawtlang ti zahawma thlamuantute an ni a; khawtlang tana an hnathawh chu a ropuiin a chhuanawm hle a ni, a ti a. Minister chuan Building sak anih theihna tura rilru leh ngaihtuahna senga thawktu hruaitu hmasate leh tuna hruaitu  awm mekte chu an chhuanawm hle a ni, a ti a. Building sak tanna tura sum thawhtute, Pu Ronald Sapa Tlau, MP (Rajya Sabha) leh UD&PA Department te hnenah lawmthu Minister chuan a sawi a. Building thar sak tur chu mite tana malsawmna leh mamawhtute tana tangkai tak  anih ngei a beisei thu a sawi bawk a ni. 

Zarkawt MUP Unit Building thar sak tur hi Square metre 315 awh a zau,  cheng nuai 82 senga kum 2 chhunga sak zawh hman tura ruahman a ni a. Mizopa chhiara chhawng thum bakah a chung ber Assam type-a siam tura duan a ni a. Ruahman dan chuan Building ah hian Garage, Day Care Centre, Office leh remchang dangte awm tura tih a ni. 

Building sak tur lungphum programme hi Pu Hranga Khiangte, President, Zarkawt MUP Unit-in a kaihruai a. Dr N. Pallai, Convener, Zarkawt MUP Building Committee hnen atangin report ngaihthlak a ni a. He hunah hian Zarkawt Local Council leh NGO hrang hranga hruaitute  an tel a. Mizoram Upa Pawl (MUP) Zarkawt Unit hi kum 1957 a din niin tun dinhmunah Member 201 an awm mek a ni.