Mizorama medical college changtlung tak Mizoram Institute of Medical Education & Research(MIMER) dinna kawnga hmalak zelna leh tun thlenga hmalak tawhnate chu nimin khan H&FW Minister Pu Lal Thanzara hovin ama pisaah Christian Medical College(CMC), Ludhiana Director Dr. Abraham G.Thomas, Principal Adviser to Chief Minister Pu R.Lalrinawma, H&FW Commissioner & Secretary Pu Lalrinliana Fanai leh H&FW officials ten an sawiho.
Health Minister Pu Lal Thanzara chuan Dr.Thomas'n Department sawmna ngai pawimawha a hun hlu tak senga MIMER dinhmun enpui turin leh hemi kawnga thurawn pe tura Mizoram a lo zin chu lawmthu a hrilh a, medical college dinna kawngah theihtawp chhuahpui turin a sawm a. Minister chuan a hma thei ang berah MIMER tan a nih theih nana thil tih tul pawimawh hmasa leh hmachhawpte bultanna turah CMC Director chuan hma rawn lakpui a, sorkar thurawn pe zel turin a sawm.
Dr.Abraham G.Thomas chuan MIMER chungchanga sorkarin hma a lo lak tawhnate chu tha tawk viaua a hmuh thu leh medical college din chu thil hautak nimahse Mizoram ang state mahnia medical college la nei lo tan chuan thil tul leh pawimawh tak a ni, a ti. Medical Council of India(MCI) pawhin medical college thar dinna tur chu a duh ulukin a hnathawh pawh enfiahna (inspection) tum 5-6 lai an nei thin thu sawiin Dr.Thomas chuan chuvangin a tirah inspection engemawa tlak palh a nih pawhin, chung chu siamtha turin tha thlah lova theihtawp chhuah zel turin Health Department hotute a chah bawk. MIMER din hunah pawh a bultan kum khatnaah Anatomy, Physiology leh Biochemistry subject zirtir turin Christian Medical College, Ludhiana atangin an rawn tirh thei thu Minister a hrilh bawk.
Tarlan tawh thin angin medical college dinna kawngah Mizoram sorkarin hma a lak meknaah mithiam tawnhriat nei tawhte pawh a rawn zel a, vawiina meeting pawh chutianga an hmalakna pakhat a ni a. MCI atangin inspection vawikhat an rawn nei tawh a, kumin kum tawp lamah MCI Inspection team te hi lokal leh tura beisei an ni bawk. Medical college dinna tur sum hi central sorkarin 90:10 pattern-in a tum tur a ni a mahse a thawktute hlawh leh a enkawlzuina hi state sawrkar kutah dah a ni ang a. MCI duhdan angin MIMER-ah hian zirlai 100 zir thei tura ruahman a ni a, doctor zirlai zat milin OPD-a inentir theih zat te, khum awm tur zat te, khawl leh hmanrua awm tur te, building awm tur zat te, zirtirtu leh thawktu dang awm tur zat te hi MCI in a bithliah sa leh a duhdan ang thlapa tih a ngai dawn avangin chumi ang chu tlin turin sorkar chuan chak takin hma a la mek a. Vawiina meeting-ah hian medical college-a zirtirtu hnathawk tur hetiang lama thiamna leh experience nei hi Mizo zingah an la tlem hle a, chuvangin a tirah chuan zirtirtu tam zawk chu Mizoram pawna mi chhawr a ngaih hmel thu an sawi bawk.
Attachment
- Loading attachment...
