Sorkar laipuia Ministry of Youth Affairs & Sports hnuaia Nehru Yuva Kendra Sangathan hmalaknain rampumah ‘Swatchhta Pakhwara’ (Swatchhta Fortnight) 2017 chu hman tan a ni a. Mizoram-ah pawh district 8-Aizawl, Lunglei, Siaha, Serchhip, Lawngtlai, Champhai, Kolasib, Mamit-a NYK te chuan ni 1-15 August 2017 chhungin he programme hi an hmang dawn a ni.
Kar hnih awh tur ‘Swatchhta Pakhwara’ chhung hian district 8-ah NYK chuan NSS, NCC leh thalai pawl dangte nen faina leh thianghlimna kawnga mipuite zirtirna leh hnatlang an nei ang a. Blockwise In-Charge turin National Youth Volunteers mi 70 thalnchhuahte chuan heng hmalaknate an ho ang a, Swatchhta Pakhwara puala Prime Minister leh Union Youth Affairs & Sports Minister te thuchah bakah faina chungchanga Mahatma Gandhi thuziahte pawh mipuiten a zau thei ang bera an hriat theih turin chhiarchhuah thin a ni bawk ang.
Heng bakah hian khawtlanga mi pawimawh leh mithiamte chu sawmin hmun hrang hranga youth club leh thalaite infuihna hun hman tum a ni a. Faina chungchang mipuite inzirtirna kawngah door-to-door campaign neih bakah khawlai hmun langsarah mipuite chhiar theih turin he Fortnight pualin banner-te tar a ni bawk ang.
