Vawiin tlai dar 4 khan Pu Joseph Lalhimpuia, Parliamentary Secretary Commerce & Industries Department leh bialtu MLA ni bawk chuan Electric Veng Lungleia Agriculture Marketing & Training Infrastructure building sakna tur hmun a tlawh. 

Pu Joseph Lalhimpuia chuan Lunglei khawpui chhungah hmasawnna hna lian tak tak kalpui mek a nih thu sawiin, hmasawnna tura ruhrel duan mek kalpui dan te a tarlang a. Lunglei Chanmari-ah Rs 4.9 Crores man Hall sak zawh tep a nih thu sawiin, Ramthar Veng Hall tur pawh hna tan theih tep anih thu a sawi a. Kendriya Vidalaya School, Ramthar Veng atan pawh building sakna tur sum hmuh fel anih tawh thu a sawi bawk. 

He building thar tur hi Electric Veng YMA ten an ram a thlawna an pek niin NABARD Consultancy Services Pvt Ltd (NABCONS) atanga Rs 987.98 Lakhs hmanga sak tur a ni a. NABCONS hian pawisa pawh an sanction fel tawh a ni. He building lian tak chhungah hian Agriculture marketing facility, Office building, Dormitory /Hostel te, Badminton Hall (court pahnih awmna) leh parking area LMV 40 bawr vel dah theihna tura ruahmanna siam mek a ni. 

Parliamentary Secretary  hi Pu Zothankhuma, Commissioner, Commerce & Industries Department leh Pu Lalmalsawma, Secretary, Finance Department te leh sawrkar mi pawimawh dang ten  a hmunah an tawiawm a. Electric Veng khawtlang hruaitute VC leh YMA hruaituaten an lo dawng sawng a ni.