Vawiin chawhnu dar 1 khan Myanmar atanga lokal Chin Media Network (CNM) member-te chuan I&PR Minister Pu Lal Thanzara chu a office chamber-ah an kawm.

I&PR Minister Pu Lal Thanzara chuan India ram leh Myanmar rama cheng, Zohnathlak zawng zawngte chu sawrkar hran hnuaiah awm mah ila ramdang mi anga in en lovin tha takin kan la inpawhtlang thei a ni, a ti. Myanmar sawrkar thara Mizo hnathlak thahnem tak Member of Parliament (M.P.) tura an tling thei chu lawmawm a tih thu leh sawrkar thar hnuaiah ram pahnihte inkungkaihna tha zawk a awm ngei a beisei thu Minister chuan a sawiin amah kawmtu CMN member-te chu tan la turin a sawm bawk.

Pu Vanneihtluanga pawhin journalist lokalte chu vawi leh khatah an thil tumte hlawhtling nghal theilo mahse beidawng lova hma la zel turin a sawm bawk.

Chin Media Network (CNM) member-te hi Pu C.L. Thanga’n a ho a, state sawrkarin chanchinbumite tana hamthatna a pekte leh an thawhho dante zirchiangin hun an hmang a ni.

Chin Media Network hi kum 2012 khan Burma Chin State huam chhunga journalist te’n an din a ni a. Tunah hian member 13 (press) an awm mek a ni.