874/2022-2023
Aizawl the 11th June, 2022 : I&PR Minister Pu Lalruatkima'n tukin khan a bial chhung Dawrpui vengthar a MLA fund hmanga hnathawh te a enfiah.

Pu Lalruatkima hian Dawrpui Vengthar veng chung lama lirthei inherhna tura siam enin he lirthei inher theihna tur hian Pu RK Lalchhuana'n a ram satthlain zauh a ni a, lirthei inher theiha siam a ni a, hei bakah hian Pu RK Lalchhuana in bul a kawng chhuat tha tawk tawh lo chu RCC pavement hmanga siam that a ni bawk a ni.

Hei bakah hian Pu Lalruatkima hian Dawrpui vengthar atanga Zarkawt panna kawng siam that dan tur te, kawng a zim avangin mihring kea kal tan a him tawk loh avangin ke a kalna siam dan tur te a enfiah bakah ke kalna siamna tur sum pawh tihfel a ni tawh a ni. Hei bakah hian MLA fund hmanga thil siam leh siam hmabak la awm te a enfiah a ni.

Hemi hnua khawtlang hruaitute nen an inkawmhonaah Pu Lalruatkima chuan, MLA fund hmanga thil siam zawh tawh chin te chu a that thu a sawi a, he tihrual hian hna thawktuten veng chhung tan a ni tih hre chunga hlawkna ringawt rilru a dah lova mawi, tlo leh rintlak a an thawh a tul a ni a ti a, tuna hna thawh hmabak la awm te pawh sawisel kai lo tur bera thawh a tul tih sawiin MLA fund hmanga siam chu a senso zat te tarlan vek a nih thin avangin a sum sanction leh hna chu a inmil a tul a, hetiang tur hian thawktute pawhin an thawh a ngai a ni a ti. Pu Lalruatkima chuan khawtlang mipuite pawh hna an thawh that leh that lo an lo vilpui ve a duh thu sawiin, a hnua insawisel mai loa, khawtlang tan a ni tih hriaa tanho a tul thu a sawi bawk a ni.

Minister Pu Lalruatkima hi Dawrpui Vengthar khawtlang hruaituten an tawiawm a ni.