Vawiin khan I&PR Minister Pu Lalruatkima chuan Khawzawl Darngawn Vengah Deputy Commissioner Office thar chu a hawnga. He hunah hian Khawzawl District  DC Pu H.Lianzela leh Khawzawl District SP Pu PC Lalchunglura te leh District mipui thahnem tak an tel a ni.  

Khawzawl DC Office a hawn  hnu hian Khawzawl Zaingen YMA Hall-ah Deputy Commissioner leh Superintendent of Police puala inhmelhriattir a leh in lawmna inkhawm, Joint Villa Khuallian niin a hmanpui bawk a ni. 

Vawina Khawzawl District puala hun pawimawh a hman naah hian I&PR Minister Pu Lalruatkima chuan Deputy Chief Minister Pu Tawnluia, bialtu MLA ni bawk, ngenna anga lo kal a ni tih a sawi hmasa a.   Hun rei tak chhung, nghakhlel taka Khawzawl leh a chhehvel mipui ten an lo beiseiin a tak ram a lo chang ta chu a lawmawm takzet tih a sawi a. "He district hi kum 2008 khan a piang tawh a, kum 10 a function theihloh hnuah tunah a paitu ngeiin a hring ta hi a lawmawm zual bik a ni", a ti. Thinlung takin Khawzawl District mipuite, he hlawhtlinnah hian a lawmpui tih a sawi a. "Sawrkar chuan ngun taka ngaihtuahna sengin District thara Office dah hmasak ngai, DC Office leh SP Office atangin bul kan tan ta a ni a.  Chief Minister chak tak, kaihruaina hnuaiah theihtawp kan chhuah zel anga; Revenue Department, RD, I&PR leh Department suanluh hmasak ngai te pawh dah chhoh zel kan tum a ni", a ti. 

I&PR Minister Pu Lalruatkima chuan district mipuite chu sawrkar hmalakna hrang hrangah phur taka sawrkar tawiawmtu, DC leh SP hmalakna te tha taka thlawptu ni turin a chah a. Bawrhsap Office thar chu dikna leh rinawmna tlangnelna hmun. Thleih bik nei lova rorelna, mipuiten an thil mamawhte inthlahrung miah lova an then theihna hmun ni se tih kan beisei a ni a ti. District tharin beiseina thar, a bial mipuite tan a siamsak a. Chutih rualin a District Capital chhunga mipuite mawhphurhna a sang sawta; Bawrhsap Office leh District Office dangte lo dawrtu, mikhualte chungah that chhuah nachang hre reng turin a chah a. Rilru zau taka district mipuite leh pawnlammite tan inhawng turin Khawzawl khaw mipuite chu District Capital-a cheng an nih angin ngen leh beisei an ni a ti. India rama cheng kan nih hre reng chunga khual tha khual chhia kan dawn sawn kawngah leh ram pawnlam mikhual kan dawn danah thleng pawh kan inhawn thiam a ngai a.  Kawng tinrengah District thar a nih angin tan a lak nasat zual bik a ngai dawn tih a sawi a. Khawpui thang zel tur te mithla thiamin kawngpui hnaih lutuk lova insak kan thiam te pawh a ngai dawn a ni a ti.Kawng tam takah hmasawn a pawimawh rualin Faina leh Hriselna kawngah bikah hmasawn a pawimawh zual tih a sawi a ni. Faina kawng bikah phei chuan Mizorama khaw fai ber awmna District a nih avangin District Fai ber ni turin theihna sang tak a nei nghal a ni a ti a. Khawzawl District mipuite chu District pek phu nih ti lang turin hmasawnna kawnga sawrkar hmalakna thlawp tlata, rahbi thar duhawm tak kai zel turin duhsakna a hlan nghal bawk a ni.  

Khawzawl District Bawrhsap Pu H. Lianzela chuan atirah, a mawhphurhna thar chu huphurhawm hle in lang  mahse Khawzawl mipuite phurna nasa tak te leh tumruhna hmel te a hmuh avangin  a rilru pawh a thlak tawk a. Beiseina thar leh District tana hmathlirna thui tak nen vawiinah a hna a rawn zawm a ni tih a sawi a. District pian theihna atana theihtawp lo chhuah tute zahna chibai a buk tih a sawi a. District in enge min tihsak tih zawnga ngaihtuahna siam lova district tan enge kan tih theih tih ngaihtuahna nena hmalak puiah mipuite chu a sawm a ni. Khawzawl District chhunga mipuite bakah Head of Office te chu thawhpuia sawmin District changtlung zawk nih theihna atana an ruahmanna te(Road Map) a rang lama buatsaih turin a chah bawk a ni. 

Khawzawl SP Pu PC Lalchunglura pawhin Police leh mipuite thawhhona tha a awm theih nan mipuite phungbawmna a ngen a. Khawzawng District chhunga mipuite chu dan leh hrai  kaihnawih thil an kutah chinfel tum lova thuneitute hnena hlanchhawn ngai pawimawh tlat turin a ngen a. Hmun thenkhatah ngaihtheihlohna rilru Anti-Police a awm thin tih sawiin Law & Order kenkawhna kawngah thil fello tak a nih theih avang leh a tawpa tuartu mipui an nih leh thin a vangin Khawzawl Mipuite chu Police thian, Pro-Police ni turin a chah bawk a ni. 

Minister, DC leh SP te hmuahna hi Khawzawl District leh Saitual District inrina, Tuivawl Lei kamah a in tana. He hmunah hian Khawzawl District Implementation Demand Committee(KDIDC) puipate, Kawlkulh leh Dulte Village Council member ten Minuster leh a thuihruaite hi an lo dawngsawng a. Kawlkulh Joint VC, Joint YMA keh Khawtlang puipa ten Kawlkulh Highway Restaurant-ah tukthuan an lo buatsaih a. Khawzawl khaw tawntirh, Chalthei Kawnah Khawzawl District Official te leh Joint YMA ten Minister, DC leh SP te ropui takin an lo hmu bawk a ni.

Khawzawl DC Office thar hawnna Programme hi Pi ST Lalvensangi, SDO(S), Khawzawl chuan a kaihruaia. Zaingen YMA Hall chhunga vantlang inkhum chu joint VC te leh KDIDC ten an kaihruai thung a ni. Khawzawl District lawmna inkhawm hi Kum 2008 a Khawzawl, District a puan champha September 12 hian neih a ni dawn a ni. Tun dinhmunah, Khawzawl diatrict-ah  hian khaw 28 a awm mek a. Khawzawlah bik hian In 3000 chuang a awm mek anga chal niin a chhunga cheng mipui pawh 14,000 bawr vela chhut a ni.