No.3009/2021-2022

Aizawl, 16th November, 2021 : November ni 16 hi National Press Council of India din champha a nih angin ramchhung hmun dangte rualin Mizoram Journalists’ Association (MJA) General Headquarters pawhin vawiin khan Press Club, Treasury Square, Aizawl-ah ‘National Press Day’ an hmang a. He hunah hian I&PR Minister Pu Lalruatkima chu Khuallian niin Mizoram hmun hrang hranga chanchinbu mi leh media dang kaihhnawiha thawk zawng zawngte chu chibai bukin duhsakna sang ber a hlan a ni.

National Press Day lawmna hun MJA Gen. Hqrs. President Pu Zonunsanga Khiangte kaihhruaiah Khuallian Pu Lalruatkima chuan Journalism hi inkaihhruaina tha tak nei, mumal taka din chhoh leh hna zahawm tak a ni tih sawiin, National Press Day-ah hian mediaperson leh Journalist te chu mipui beng an ni tih hre rengin, taima tak leh dikna nen hna thawk zel turin a chah a. Journalist inkaihhruaina dan leh mawhphurhna hi vawng tlat turin leh chanchinbua thil chhuahte pawh a dik tawk em tih enfiah turin a chah bawk. Media hi hman thiam chuan ram pawhin hma a sawn dawrh thei a, hman sual erawh chuan buaina leh harsatna nasa tak thlen theitu a ni zawk thei a; chuvangin thingtlang kilkhawr tak tak thlengin media kaltanga thuchhuahte hi mipui tibengvartu leh hriatna kawnga hmasawnna thlentu nise a duh thu a sawi a. US President hlui John F. Kennedy a khan ‘Media hmanga mipuite dikna hrilh ngam lo leh thu dik lo vawrh darhtu tamna ram chu mi dawihzep chenna hmun a ni’ a ti a, chuvangin thudik tan ngamna kawngah pawh Journalist te chu hmasawn turin a ngen bawk. Journalist-te tan Sawrkar a ding reng a, a la ding zel dawn a, chumi rual chuan Sawrkar hmalakna, hlawhtlinna leh policy te pawh thahnem ngai taka puanzar sak a, sawrkar hmalakna a dik em tih vengtu pawimawh tak an ni tih hre reng turin a chah. Democracy ramah chuan Freedom of Press zarzoin media-te zalenna zau tak pek an ni a, hmansual palh erawh thil pawi tak a ni thei tih hre thar leh ang u a ti bawk.

Thu a sawi zelnaa I&PR Minister Pu Lalruatkima chuan Covid-19 hrilen avangin rampumah nikum atangin lockdown neih thin chuan ruahmanna neih sa, heng Parliamentary training te, Press tour leh a dangte chu thulh a ngai vek ta chu pawi a tih thu a sawi a. Hripui leng boruak a ziaawm chhoh zel leh hun tha a la inher chhuak zel turah beisei ila, heng ruahmannate pawh tihpuitlin ngei a nih tur thu a sawi. Journalist-te pension scheme zirchiang tura Study Group din te pawhin uluk takin an bawhzui zel thu sawiin Minister chuan Press Enclave chungchang pawh Covid hripui leng avangin duh angin a bawhzui chak theih loh chu pawi a tih thu a tarlang bawk. Tunlai khawvelah media, a bik takin social media, a chak tawh em em a, heng hmang sual tur ven nan mainstream media-ten tun aia nasa zawka tan lak leh cho (compete) pha turin insangmar a ngai zel dawn a ni a ti. National Press Day puala ‘Drugs Awareness Campaign’ an hman tur chu a pawimawh a tih thu leh ruihhlo do kawngah media-te tangkaizia leh tan lak a tulzia Minister hian a sawi bawk.

MJA Gen. Secretary Pu Zohmingmawia’n report a pek hnuah MJA President hlui leh ex-officio Pu Vanlalrema Vantawl chuan keynote address a sawi a. Thuthar thehdartute chu mi hnuaihnung zawkte thlavang hauh turte, aw nei pha ve lote tana awrawl chhuah tura beisei an ni a ti a. Kumin National Press Day-ah pawh hian khawtlangin kan buan mek ruihhlo chungchangah kan ram leh ngawlveite dinhmun inhrilhhriat nan hman nise tiin MJA leh END te chuan ruihhlo tihrem kawngah mipui hnena thehdarh dan tur sawihona hun an nei thei chu a lawmawm hle a ni a ti.

Vawiin National Press Day pualin ‘Drugs Awareness Campaign’ neih nghal a ni a, he hunah hian Pu Peter Zohmingthanga, Asst. Commissioner, Excise & Narcotics Department chu Resource Person niin tun dinhmunah Mizorama ruihhlo tawlh/zawrh dan leh ruihhlo hmangsualte enkawl dan tur chungchang chipchiar takin a sawi a, hei hi mediaperson-te nen an sawiho zui nghal a ni.