1842/2024-2025

Aizawl, the 30th August, 2024: Directorate of Information & Public Relations Department buatsaih Mizoram Information Service (MIS) Officer-te tana ni 2 chhung awh 'In-House Training for MIS Officers' chu vawiin khan zawhfel a ni a. A kharna hun vawiin chawhnu dar 3:30 a I&PR Conference Hall, Lianchhiari Rûn, Aizawla neih chu I&PR Secretary Pi Betsy Zothanpari Sailo chuan hmanpuiin trainee-te hnenah certificate a hlan a ni. 

He hun hmanpuitu I&PR Secretary Pi Betsy Zothanpari Sailo chuan tunhma atanga I&PR Department hmalakna leh hmingthatnate chhawmnung zel tura tanrual a pawimawh thu sawiin, hemi atana hmalakna pawimawh tak pakhat in-house training buatsaih a ni leh tluang taka zawhfel a ni chu lawmawm a tih thu a sawi a. MIS Officer-te chu mawhphurhnate tha taka hlenchhuah tum tur leh Sawrkar hnathawk, mipui rawngbawl an nih anga thahnemngai taka thawk turin a fuih a. Hmasawn duhna thinlung pua hmalam pen tum tur leh thawhpuite nena lungrual taka hna thawh tum turin a chah a ni.

I&PR Secretary chuan Department hnuaiah reorganization kalpui chhoh mek a nih thu leh hnathawhna tur hmanraw mamawh angte pawh ngaihtuah zel a nih thu a sawi a. Kalkhawmte chu Office building, ram leh bungruate neitu thinlung pua enkawl a tul thu sawiin, Office inrelbawlna kalphung leh inkaihhruainate ngun taka zirchianga Sawrkar thuchhuahte ngaihven reng thin turin a chah a. I&PR Department chu Sawrkar thuchhuak puangzartu ber a nih avangin thu ziah leh puanzar kawngah fimkhur taka hmalak tlan a tul thu a sawi bawk. 

Thusawitu dang I&PR Director Pu C. Lalnunkima chuan MIS Officer-te pual ni 2 awh training hlawkthlak tak hman a ni leh, hun reilote chhunga topic pawimawh tak takte zirho a ni chu lawmawm a tih thu sawiin, zirtirna pe tura sawm resource person hrang hrang, Course Co-ordinator leh Trainee-te inpekna fakawm a tih thu a sawi a. Training kaltlanga thil zirte tangkai taka hmang turin duhsakna a hlan a ni. 

He hun hi Pu F. Lalfakzuala, Jt. Director, I&PR Department chuan kaihruaiin trainee-te aiawhin Pu Lalchhuanawma Ralte, DIPRO Champhai leh  Pu Lalzara, DIPRO Khawzawl te'n thu an sawi a. Pi Mina Zoliani, Dy. Director & Course Coordinator-in lawmthu sawiin hun hman a khar a ni. 

Ni hnih chhung awh 'In-House Training for MIS Officers' ah hian District hrang hranga MIS Officer-te bakah Directorate of I&PR hnuaia MIS Officer-te an tel a. Sawm bik mithiam resource person 9 te'n MIS Officer-te tana hriat tur pawimawh hrang hrangte bakah Office hna kentel tul hrang hrangte topic 14 ah thenin an zirtir a, training hlawkthlak tan hman a ni.