1841/2024-2025

New Delhi, the 30th of August, 2024: Vawiin khan Physical Education Foundation of India (PEFI) leh Sport India Foundation bultumin Pragati Maidan, New Delhi-ah Sport India Conference, 2024 buatsaih a ni a. He hun ah hian Pu Lalnghinglova Hmar, Minister of State, Sports & Youth Services Department chu Khual zahawm niin Madhya Pradesh Sports Minister Pu Vishvas Kailash Sarang chu khuallian a ni.

Mizoram Sports Minister Pu Lalnghinglova Hmar chuan Sport India Conference hawnna-ah thu sawiin, sports chu intihhlimna mai ni lo, thalaite eizawnna leh India ram tihhmingthatna hmanrua ni thei turin a ram pum ang a kan inher rem a tul thu a sawi a. Mizoram chu State lian lo tak ni mah se tunhnai kum 10 chhungin India ram football league sang, ISL leh Indian Super League-ah player 192 a thawh thei tih sawiin, grassroot level atanga zirtirna tha inpek a pawimawh zia a sawi. Sports-a hlawhtling tur chuan a thiam ber zinga tel a ngai a, Olympic-a hlawhtlinna thlir chungin tun atanga hma lak a tul tawh tih a sawi bawk a ni.

Pu Lalnghinglova Hmar chuan, India in kum 2036 Olympic Games thlen a tum a, chumi atan a inbuatsaih nan Mizoram chuan June 13-14, 2024 ah Mizoram Sports Conclave a buatsaih a, hma kan la tan tawh a ni, a ti a. India ram a infiamna lar ber Cricket thlauhthla chuang lovin, India infiammite țhatna Olympic sports discipline dang ah nasa zawk a țan lak a tul thu a sawi.

Sport India Conference buatsaihtute ngenna angin Mizoram Sports Minister chu panel discussion-ah a tel a. Mizoram khua zawng zawng hrutchhuak-a sports coaching project lian tham kalpui tum a nih thu leh, sports-a theihna nei tha te zawnchhuahna project pawimawh tak a nih nghal tur thu a sawi. Moderator zawhna chhangin Pu Lalnghinglova Hmar chuan, “Mizoramah Hockey chawinung leh turin hma lak mek a ni. Hockey chu hman atanga India thatna, khawvel mithmuha India phochhuaktu a ni a, hockey hi kan ngaih pawimawh zing a mi a ni dawn. Mizoramin hmeichhe hockey-ah nasa tak a hma kan sawn laiin mipa lam ah tan lak kan la ngai a, theihtawp kan chhuah dawn” a ti.

Kumin a Sport India Conference ah hian sports inrelbawlna dikin ram economy-a hmasawnna a thlen theih dan thlirhoin inkhawmpui neih a ni a. Sport inkhawmpui lian ah hian “Global Trends and Opportunities in Sports Management: Impact of Professional Leagues and Sports Tourism on Economic Development” tih thupui hmangin India ram State hrang hranga sports thuneitu (administrator) te, sports industry leh private organisation lian te, sports University hotu lawk te leh sports lam a tui mite an tel a ni. Sport India Conference pual hian August 29 – 31, 2024 chhungin Pragati Maidan-ah Sports India Expo neih niin, India ram chhung leh pawna sports industry liante’n an thil siamte an phochhuak a ni.