1840/2024-2025

Dated Serchhip, the 30th August, 2024: Vawiin khan Serchhip DC Conference Hall-ah  Project Management Unit (PMU) Mizoram leh PHED Serchhip Watsan Division tangkawp buatsaihin Serchhip RD Block leh E.Lungdar RD Block huamchhung a WATSAN Committee te tan Consultation Meeting on Plastic Waste Management Centre neih a ni a. He hunah hian Er. H. Duhkima, Director, PMU, PHED chu khuallian a ni.

Er.H.Duhkima chuan Plastic Product chu  thil hman nuam leh awlsam a nih avangin mitinin kan hmang uar a, amaherawhchu kan environment a tihchhiat nasat avang leh kan ram lui te a tibawlhhlawh nasat avangin hman tawh loh kan inzirtir a ngai a ni, a ti a. Hman khat daih plastic hman hi danin a khap a, National Green Tribunal (NGT) chuan bawlhlawh hal leh paih  a khap tlat a ni, a ti. Serchhip District ah Waste Management hlawhtling taka kan kalpui theih nan sawrkar leh mipuite thawhona tha neih a tulzia khuallian chuan a sawi a. Mizoram  hmun thenkhata Waste Management an lo kalpui tawh dan te a tarlang bawk.

He hunah hian Pu Lalrinzuala, Addl DC  Serchhip – pawhin  thusawiin,duhdah taka bawlhlawh paih chuan a thalo lamin nasa takin nghawng a nei thin, a ti a.

Bawlhlawh sawngbawlna kawngah  PHE leh UD&PA Department te hmachhawp leh DC Office hnuaia din ‘District  Convergence Plan on Solid Waste Management’  chungchanga  mawhphurtu  tur bik ruahmannna  siam a nih thu te, Serchhip District chu Mizoram mipuite entawn tlak ni tur leh  District fai ber ni thei tura hmalak a nih tur thute a sawi a. District  chhung khaw hrang hrang atanga khawtlang hruaitu kalkhawmte chu bawlhlawh thliar hran dan tur inzirtirna kawngah thawhhona tha tak nen tan la thar leh theuh turin a fuih bawk a ni.

Thenzawl a ‘Plastic Waste Management Centre’ aiawhin  Pu PC Lalnunpuia, Green Herd Pvt.Ltd chuan kan nitin bawlhlawh  thin te chu leitha leh  thil tangkai zawka siam chhuah an tum thu a sawi a. Plastic bawlhlawh sawngbawlna  tura  hmalak an tum dante  power point presentation hmangin  kalkhawmte a hrilhfiah a, documentary film tawi an buatsaih chu thlirho a ni bawk.

Vawiin program ah hian Serchhip leh E.Lungdar RD Block huamchhunga WATSAN  Committee aiawh kalkhawmte nen Thenzawl a Plastic Waste Management Centre chungchang leh an tangkai  theih dan turte sawihona hun hman ho a ni a. Thla thar September ni 15 hmain Gram Sabha koin mipuite remtihna lak ni se, chumi hnuah inhmuhkhawmna nei lehin, report chu District Coordinator SBM(U) ah thehluh ni se, tiin an rel a ni.

Vawiin program Er.Isaac Lalchhuanmawia, Sr.EE PHED chuan kaihhruaiin Pu Lalchuangliana, Consultant, PMU hnen atangin Solid Waste Management chungchang ngaihthlak a ni a. Er.Vanlalmuanawma, SDO PHED Serchhip in lawmthu sawiin hun hnung a khar a ni.

Vawiin vek chawhnu dar 2 khan ‘District Water Testing Laboratory’, New Serchhip PHED Office Complex a bun chu Er. H. Duhkima, Director, PMU,PHED Mizoram chuan  a hawng  nghal bawk a ni.