1419/2026-2027

Aizawl, the 16 July, 2026: Vawiin khan IPRP&S Department changtu Minister Pu B. Lalchhanzova hovin Angel’s Garden, Zonuam, Aizawlah Directorate of Information & Public Relations (DIPR) Mizoram hnathawh hrang hrangte thlir hona leh chak zawka hmalak zel dan turte sawi hoa inrawnkhawmna "DIPR Conclave 2026" neih a ni.

He hunah hian IPRP&S Minister Pu B. Lalchhanzova chuan department hmasawn nana pawimawh hrang hrangte inpawhtlang taka sawi hona DIPR Conclave buatsaih a ni chu lawmawm a tih thu a sawi a. Mipui rawngbawlna kawnga Department hrang hrangte hna thawh chu langtlang leh chak zawka kalpui a pawimawh hle tih tarlangin, DIPR hotute chu mipuite beng pawimawh tak an nih avangin inchher hriam zel turte, mahni leh mahni inel a, mahni zawn theuha hmasawn tum zel turin a chah a. DIPR chu mipui leh Sawrkar Department zawng zawng ta an ni tih hre reng tura chahin, Conclave chu hlawkthlak taka hmang theuh turin duhsakna a hlan a ni.

Thusawitu dang IPRP&S Secretary Pi Betsy Zothanpari Sailo chuan Minister thahnemngaihna bawhzuia Department hmalak zel dan tur sawi hona hun tha tak buatsaih a ni chu lawmawm a tih thu a sawi a. A hlawhtlin theih nana tha thawhtute fakawm tiin, DIPR Conclave chuan rah tha a chhuah ngei a beisei thu a sawi bawk.

Vawiin Conclave-ah hian IPRP&S Secretariat leh Directorate of Information & Public Relations-a hotute kokim takin an tel a. Hun hman hi Pi Mina Zoliani Joute, Jt. Director, DIPR chuan kaihruaiin, Director Pi K. Vanlalsangi'n kalkhawmte lawmna thu a sawi  a. DIPR hnathawh leh hmalak dan tur topic hrang hrangte chu senior officer-te hnen atanga ngaihthlak niin, sawi hona hlawkthlak tak neih zui a ni.