4394/2025-2026

Dated Aizawl, the 11th February, 2026: Vawiin khan Pu B. Lalchhanzova, Minister, Information & Public Relations, Printing & Stationery Department, etc. chuan I&PR Directorate buatsaih, ni sarih chhung (February ni 11, 2026 - February ni 17, 2026) Delhi-a Press Tour-a zin tur Mizoram Journalist Association (MJA) member 8 leh I&PR Directorate aiawh 2-te a vai liam.

Vai liamna hun tawi hi I&PR Director Room-ah neih a ni a. IPRP&S Minister Pu B. Lalchhanzova chuan thu sawiin, zin chhuak turte chu Mizo tana ‘ambassador’, Mizo hmel lanna an nih bakah Mizo mipuite tan pawha Mizoram pawn thlirna mit an ni tih sawiin, press tour chu inzirzau nan leh ram tana hlawkna hawn thei tura hmang turin a fuih a. An rawn let huna an zin report ngaihnawm leh bengvarthlak tak chhiar a beisei thu leh hmun dangah pawh press tour la neih zel tura ruahman a nih thu a sawi bawk.

MJA President Pu C. Lalrambuatsaiha pawhin thu sawiin, press tour lo neih tawh thin a nih dante leh Minister chak tak hnuaia neih a ni leh thei chu lawmawm a tih thu a sawi a. Zin turte chu tluang taka an hun hmang tura duhsakna hlanin, hotute zahngai zel turin a fuih a ni.

Pu F. Lalrinfela, District Information & Public Relations Officer, Hnahthial chu Tour Leader niin, Pi Zoremmawii Fanai, Audio Visual Production Assistant, I&PR Directorate chu Assistant Leader a ni a. MJA member-te hi district hrang hrang atanga thlan niin, Pu C. Lalhmachhuana, Vice President, MJA-in a ho thei a ni.

Vai liamna hun hi Pi K. Vanlalsangi, Director, I&PR chuan kaihruaiin, Pi Mina Zoliani, Joint Director-I, Pu Malsawmsanga, Joint Director-II leh I&PR officer dangte bakah MJA General Headquarters aiawhte an tel a. Tun thla tawp hian batch dang tan Kolkata-ah Press Tour neih tura ruahmanna siam a ni bawk.

Delhi Press Tour-a zinte chu a hnuai mite hi an ni:

1. F.Lalrinfela (DIPRO)
2. Zoremmawii Fanai(AVPA)
3. C. Lalhmachhuana, (Vice President, MJA), Youth Herald
4. LT Sanga, Aizawl, Morning Post
5. Lalchhanhima, Aizawl, LPS
6. Vanlalruata, Aizawl, Zorin
7. R. Lalmuansanga, Serchhip, Sunday Post
8. P. Lalchunglura, Mamit, DDK
9. F. Zosangliana, Hnahthial, Calathea
10. Lalchhuanliana, Champhai, Lenrual