Ni hnih cham tura vawiina Aizawl lo thleng, Italy Consul General, Kolkata Pu Cesare Bieller chuan vawiin tlai khan Chief Minister Pu Lal Thanhawla chu a chenna bungalowah a hmu.

Consul General hian India ah kum nga a awm tawh thu leh India ram State pahnih Mizoram leh Arunachal Pradesh tih loh chu a tlawh kim vek tawh thu Chief Minister hi a hrilh a. Mizoram hring dup mai a hmu chu nuam a tih thu a sawi a. Mizoram leh Italy ten economic lama inlaichinna neih theih dan kawng awm se a duhthu te sawi bawkin, Italy ram tlawh duh an awm anih chuan Visa a pek theih thu Chief Minister hi a hrilh bawk a ni. Chief Minister chuan Mizoram a rawn tlawh thuah lawmthu a sawi a, ram dangte nena inlaichinna tha siam chu kan duh ber pakhat a ni a ti.

Pu Cesare hi naktukah Reiek tlang tlawhin, a riak nghal ang a. Ram kala puanina zan riah a chak thute sawiin, Phawngpui leh Hnahlan khua te tlawh a chak thu a sawi bawk a ni.

Pu Cesare hi Chief Minister chuan duhsakna thilpek a hlan bawk a ni.