Ni 18-20 December, 2015 a DGP/IGP Conference neih tuma an thu rel bawhzuiin Ministry of Home chuan chhiatrupna thlen palha lo inpuahchah lawk theih na atana tih chhinna Mock Drill chu zirna in hrang hrang ah hunbi nei a ti tur in Mizoram sawrkar a rawn hriattir a. Chu thurel bawhzui chuan Disaster Management and Rehabilitation Department leh hetiang lam a tangkai department hrang hrang te chuan Government J Thankima College, Bawngkawn ah a vawikhat nan vawiin khan Demonstration and Disaster Preparedness Drill an nei. Pu Lalringliana, Dy. Mayor, AMC leh a kaihhnawih Department te nen hun hman ho a ni.
Disaster Management & Rehabilitation Department in J Thankima College Principal, Staff leh zirlai zawng zawng te Mock Drill an neih pui chu a lawmpui thu sawiin khuallian Pu Lalringliana chuan tlangram chhengchhe lai tam tak awmna hmun a nih mai bakah lirnghing nat theihna Seiszmic Zone V a awm a nih avangin khuarel chhiatna thleng thei hrang hrangah mipui te kan lo inbuatsaih a ngaih thu leh chumi atan chuan Mayor kaihhruai na in a kaihhnawih Sorkar Department hrang hrang te nen Landslide Policy Committee din a nih thu a sawi a. Chutah chuan khawvela Geology lama mithiam leh mi inpe te Geohazard International India leh California (USA) lama mite pawh thawhpui mek an ni in MZU te nen tang duna leimin hlauhawm zualna leh him lo lai nia hriat te enfiah ho a nih thu a sawi bawk.
Landslide Modification Regulate na tur Sorkar-in Dan duan mek a ni in Building Regulation AMC in an kalpui mek te pawh mipuite himna tur leh chhiatrupna pumpelh theih nana hmalak a nih thu Deputy Mayor chuan a sawi a. Mock Drill programme buatsaih thin te pawh hi mipuite chhiatrupna laka him theih na tura hmalakna pakhat a nih thu sawiin J Thankima College zirlai leh hotute chu an thil zir leh hmuh atanga mipui, Nu nau leh tar upa-te malsawmna thlentu atan hmang tangkaia malsawmna thlen tu ni theuh turin a ngen a ni.
Vawiin Mock Drill neih ah hian Lirnghing leh kangmei avanga chhiatna thleng laka in chhanchhuah dan leh hliam tuarte enkawl zui dan chan a ni. He hun ah hian department hrang hrang ten chhiat rupna a lo thlen thulh a chhanchhuahna hmanrua an neih ang te pholan nghal a ni bawk. Mock drill ah hian lirnghing avanga hliam tuar te chu College Search and Rescue team, State Disaster Response Force, Sport and Youth Services Adventure Wing leh Mizoram Home Guards ten chhanchhuahna hna an thawk a, hliam tuar te chu College First Aid Team leh Health and Family Welfare Department lam a Doctor leh Nurse ten enkawlna an pe a, kangmei chhuak chu College Fire Safety team leh Fire and Emergency Services Team ten an thelh mit a ni. Mock drill neih zawh hnu hian Pu Zosangliana, Joint Director (Ops), DM&R kaihhruaina hnuaiah Debriefing meeting, neih a ni a he meeting ah hian drill neih zawh tak a tih dan thalo lai leh siam that ngai lai te sawi ho a ni bawk.
