Vawiin khan Khawvel hmundangte rualin Mamit Eye Building-ah TB Dona ni World TB Day hman a ni. Dr Hmingthanmawii, CMO chuaan he hun hi khuallian niin a hmanpui a, Dr P.C Lalliannghaka DMS chuan khualzahawm niin a hmanpui bawk.

Dr Hmingthanmawii chuan TB natna chu mizote pawhin kan hmelhriat leh he natna lo vei tawh thin kan ni a, khawvel huap leh India ram ang pawhin he natna do tur hian hmalak chhoh mek a ni a ti,tunhma chuan mizote'n TB veite kan tihin a hrang hial te'n dah an ni thin a, tunlai thiamna hmangin  TB natna hi enkawl dam theih a ni tawh a, chutihrual chuan TB damdawi ei that loh chu thil hlauhawm taka ni thung a ni a ti.

Kumin World TB Day thupui atan hian " Unite to end TB" ( TB umbo turin i tangrual ang u) chu hman a ni a, kan thenawm khawveng kan chhehvel a mite TB vei nia kan rinhlelh te chu damdawiin a in entir vat tura hrilhretu ni theuh turin khuallian hian kalkhawm te a sawm a ni.

Dr Lalliannghaka, DMS pawhin thusawiin TB natna in mihring taksa bung hrang hranga hna a thawhdan leh a natna lan chhuah dan hrang hrangte tarlangin TB natna vei nia in ringhlelte chu Mamit District Hospitala in entir vat turin leh he natna hrik hmuhchhuahna khawl tha ber chu Mamit Hospitalah pawh kawl a nih tawh thu a sawiin TB natna umbo a nih theihna turin Mamit District Hospitala thawktu te leh he huna kalkhawmte a sawm bawk a ni.

Pu A. Vansangliana STS chuan kum 2003 atanga 2016 chhunga Mamit District Hospitalin TB natna an hmuhchhuah leh enkawlzui dan report peiin mi 5203 khak endik a tangin mi 382 te chuan TB natna an vei tih hmuhchhuah a ni a, heng zinga 13 te hian nunna an chan a ni.

He hun hi Dr P.C Lalhmingliana, DTO chuan kaihruaiin Mamit District chhunga TB enkawlna lama thawk tha berah Dapchhuah Sub Centre chu thlan niin khuallianin lawmman hlanna a nei  a, Pu Hmingchungnunga, DPS chuan lawmthu sawina a nei bawk.