Agriculture lama hmasawnna tura Mizoram sorkar leh Japan sorkar thawhdunna 'Technical Cooperation Project' (TCP) workshop hmasa ber chu nimin khan ATI Auditorium-ah JICA mithiam ten an buatsaih.

He workshop hi Irrigation & Water Resources, Agriculture, Horticulture leh Land Resources, Soil & Water Conservation Department-a Project Management Team leh Block Agriculture & Irrigation Development Committee member-te tana buatsaih a ni a, mi 80 vel an tel. He Workshop hi Pu H.Lalengmawia, Seceretary, Irrigation & Water Resources Department chuan hawngin, Japan ram thiamna sang tak, khawvelah pawha a ber hauh phaten an thiamna Mizoram sorkar hnathawkte hnena a thlawn liau liaua an hlanchhawng tur hi a vanneihthlak takzet a ni a ti a. Mizoram ei leh bara hma a sawnna tur te, mipui kawng dika hruai turte leh ram hruaitute duh dana policy duan, a nihna ang taka hmang chhuak thei chu sorkar hnathawkte hi an ni a ti bawk. He TCP hlawhtlin leh hlawhchhamna chu Japan mithiamteah a innghat lo va, tihtakzeta thawh leh thawh lohah zawk a innghat a ni tiin officer rualte a fuih.