Vawiin chhun khan Japanese International Cooperation Agency (JICA) Survey Team member pahnih Shigeki Yamaoka leh Katsuyuki Yamamoto te chuan Serchhip tlawhin Serchhip Horticulture Committee Room-ah Horiculture, Minor Irrigation, Agriculture leh Soil & Water Conservation Department hotute nen an inkawm a, Serchhip District chhunga JICA Technical Cooperation Project kalpui dan tur leh hmalak dan tur te an sawiho.

Katsuyuki Yamamoto chuan Technical Cooperation Project kalpui tum anih dan tlangpui leh he project atana inbuatsaih dan tur te a sawilang a, Serchhip District chu Pilot project kalpui na tura hman an tum thu leh he project site thlang tura thutlukna siam anih theih nan Serchhip rawn kal an nih thu te a sawi a, Line Department hotute nen inkawmhona hun tha tak an nei a ni.

JICA Technical Cooperation Project hi kum 5 chhung kalpui tur niin October 2016 atanga September 2021 chhunga kalpui tura ruahman a ni a, he project hi First Pilot leh Second Pilot ah then niin First Pilot ah hian line department te chu hmalak dan chi hrang hrang DPR siam atanga Farmer/Beneficiary te Training pek dan te, Project implement  dan tur te chipchiar taka zirtir niin he First Pilot hi JICA in za ah za in a tanpui dawn a, Project te hi Line Department hrang hrang ten collaboration in an siamho dawn a, tanpuina sum leh beneficiary te erawh inchawhpawlh ani dawn lo thung a ni. First Pilot chhung hian Line Department te an tih tur thiam bel tir vek an nih hunah Second Pilot chhunzawm niin hetah hi chuan engkim JICA tanpuina tel lovin Line Department ten anmahniin an buaipui tawh dawn a, tanpuina sum pawh anmahni inngaihtuah a ngai tawh thung ang. He project in a tum ber chu "thiamna leh hriatna" inzirtir (transfer of technological/technical knowhow) a Department te theihna tihpun leh hmasawnna atana ruahmanna te a beneficiary tur te nen uluk taka siamho a langtlang tak a kalpui anih theih na tur anih thu Japan mithiamte hian an sawi a ni.

Pu Laldingliana, S.E., Minor Irrigation Department chuan he Technical Cooperation Project atan hian Minor Irrigation Department chu Nodal Department atana ruat an nih angin a bultumtu ah an tang a, amaherawhchu Department hrang hrangte nen joint-venture a thawhhona tur project anih avangin Minor Irrigation Department  ta bik a nilo a ti a, Department hrang hrang ten mipuite tana tha ber tur ngaihtuahho a ruahmanna mumal leh changtlung zawk an siamho theihna tur project pawimawh tak a ni a ti bawk.

Meeting zawh hian JICA Survey Team te leh Sawrkar Official te hian Serchhip Zawlpui phai tlawh nghalin hmalakna bultan na atana hman chi anih leh nih loh an thlithlai nghal a ni.