Mizoram Youth Commission bultumin vawiin khan Aizawl Press Club ah Army Recruitment leh Jet Airways Cabin Crew lak tur chungchang inhrilhriatna neih a ni.

November ni 2 atanga ni 6 chhung hian Rajiv Gandhi Stadium, Mualpuiah sipai lak runpui neih a ni dawn a. Soldier General Duty, Soldier Tradesman, Soldier Technical, Clerk/Storekeeper Technical, Nursing Assistant leh Inventory Management-te lak tum a ni a. Soldier GD leh Tradesman atan HSLC-a subject tina 45% aggregate hmu chin tan dil theih a ni a. Soldier Technical, Clerk/Storekeeper Technical, Nursing Assistant leh Inventory Management dil tur hian HSSLC Science leh Arts-a subject zawng zawnga 40% hmu leh 50% aggregate hmu chin tan dil theih a ni.

Soldier GD leh Tradesman dil tur hi mipa nupui la nei lo, kum 17 leh a chanve atanga kum 21 chin tan dil theih a ni a, a dang zawng hi kum 17 leh a chanve atanga kum 23 chin tan dil theih a ni thung. Dilna hi September ni 1 atanga October ni 15 chhungin www.joinindianarmy.nic.in ah tih theih a ni a. Minute 6 chhunga 1.6km tlan thlen hman tur niin a thleng hmasa duhsak an ni ang. Pull-up vawi 6 aia tam ti thei lo te chu hnawl an ni ang a, 1.6 kms run leh pull-up a tlingte hian zig zag balance leh 9ft ditch an paltlang a ngai bawk a ni.

Jet Airways Cabin Crew hi Mizoram Youth Commission Office, New Secretariat Complex ah September ni 1 ah neih tur a ni a. Kum 18-28 inkar, HSSLC leh a chunglam pass chin, hmeichhia 5’2ft aia hniam lo, mipa 5’8ft aia hniam lo, tatoo emaw ser nung hmai, nghawng, kutphah a nei lo tan a dil theih a. MYC hnuaia training ngei duhte chuan August ni 19 atanga 22 chhung in ziah luh theih a ni a. Marksheet, certificate leh passport thlalak ken tur a ni.

August ni 23 atangin MYC ah training tan tur a ni. MYC bakah Labour, Employment & Industrial Training Dept. leh Welfare Board tangkawp hian state pawnah thalai 3,322 hna an hmuhsak tawh a ni.