No.3142/2021-2022
Aizawl the 25th November, 2021 : State Institute of Rural Development & Panchayati Raj (SIRD&PR), Mizoram leh Water and Sanitation Support Organization (WSSO), PHE Department, Mizoram tangkawp buatsaihin vawiin khan Jal Jeevan Mission (JJM) hnuaiah 'Skill Development Training - Plumber General (2nd Batch) under JJM' chu SPRC Auditorium, SIRD&PR, Durtlang Leitan-ah a hawnna neih a ni a. Hemi rual hian Mizoram Youth Commission hnuaia Mistiri Training neih tan a ni bawk. He Training hi Pu Kesavan R, IAS, Deputy Commissioner & Chairman, District Skill Development Committee, Siaha District chuan Online-in a hawng.

Training hawnna hun Pu Lalhmunsanga Hnamte, Director, SIRD&PR kaihhruaiah Siaha D.C. Pu Kesavan R. chuan Mistiri leh Plumber hna hi khawvela hna pawimawh berte zinga mi a ni a, khawtin, in tinin an mamawh a ni a, chuvangin, tangkai taka hmang thei tura thiamna tak tak pawchhuak thei tura training nei turin a chah a ni. D.C. Siaha chuan thiamna a sang zela chumi mila hnathawhte pawh a chankan chhoh zel a ngai thin a, chumi tur chuan taima taka inzir zel a pawimawh a ni, a ti a. Thiamna hi a hlu a, thiam thilte hman tangkai a, ram, hnam leh chhungkaw intodelhna tur atan pawimawh a ni, a ti bawk. Pu Kesavan R. chuan fimkhur tak leh tha taka, thawk tura anmahni chhawrturte lungawina tlinga hnathawh thin a pawimawh thu sawiin, tuna training chhuakte chu mi hlawhtling ni ngei tura duhsakna a hlan a ni.

Training hawnna hunah hian Er. C. Lalthlansanga, Course Director/Core Faculty (RE), SIRD&PR chuan training neih dan tur tlangpui leh an zir turte a sawi a. Dr. MS Dawngliani, Senior Core Faculty, SIRD&PR chuan training chhunga zawm tur leh hriattur pawimawhte a sawi bawk a ni.

JJM hnuaia Plumber Training hi batch 2-na niin, Mizoram hmun hrang hrang atangin mi 40 leh MYC hnuaia Mistiri training-ah hian Siaha District atangin mi 10 an tel a ni.