Mizoram chhunga Tourism Department enkawl Lodge reng reng ah VIP quota a awmlo"   - John Rotluangliana

Tourism Minister Pu John Rotluangliana chuan nimin khan Serlui 'B' Hydel Project Dam bula Mizoram Sawrkar hmalakna a Tourism Department in Rs. 3,56,61,000/- senga Tourist Lodge an sak chu a hawng.

He Tourist Lodge hi "Construction of Tourist Resort Phase-II at Serlui "B" under Tourist Destination Project", Kolasib District hnuaia sak niin kum 2012 April thla a sak tan kha a ni a, a building sak hna hi kum 2014 February thla khan zawhfel a ni.

Tourist Lodge tuala hawnna inkhawm buatsaih ah Tourism Minister Pu John Rotluangliana chuan Tourist Lodge sak zawh anih hnu kum li lai ral hnu a hawn theih chauh anih chhan sawiin a building leh hmunhma te peihfel vek tawh ni mahse thil pawimawh dang - tui leh kawlphetha pekna tur duh anga tihfel mai a harsat vangin mikhual thlenna tura hawn a remchang thei lawk lova; tunah erawh chuan tu te tan pawh thlamuang tak leh nuamsa taka thlen theih anih tawh ngei a beiseiawm ani a ti. Minister chuan Mizoram Sawrkarin Mizoram chhungah Tourist Lodge a sa hnem tawh thawkhat a, heng zinga engemawzat chu mimal kutah a hlan chhawng hial tawh a, Department a thawktu office leh staff te thahnemngaihna avangin Department pawhin hma a sawn chakin kalphung thar tha zawk a kal tumin chak takin hma lak mek zel a ni a ti a, Indian rama a hmasa ber tur "skywalk" Sakawrhmuituai tlang a sa turin chak taka hma lak a ni a, hemi atana hman tur pawisa pawh a awm vek tawh ani a ti a, Durtlang leh Chaltlang Tourist Lodge inkara kilometre 2 chuang a thui "ropeway" sak hna pawh a bul tan anih tawh thu a sawi bawk. Serlui "B" Hydel Project pawh mipui leh khualzin hip lehzual tura tihchangtlunna tur ruahmanna lian tham tak Sawrkarin a siam a, Sawrkar Laipui pawmpui tura chak taka nawr mek niin kumin December thla ral hma hian sum hmahruai (first installment) hmuh beisei anih thu leh hna tan hman anih a beisei thu a sawi bawk.

Minister chuan Mizoram chhunga Tourism Department enkawl Lodge reng reng ah VIP quota a awmloh thu leh mikhual thleng hmasa room tha chang thei apiangin an chang hmasa ani mai a ti a, room luah hmasa tuten an remtihna a an kian anih loh chuan VIP nih vanga inluahlan ngawt a theih chuang lo tih a sawi a ni. Hnamdang khualzinte hip turin kan thinlung puan in kan zauh ve a ngaih thu a sawi bawk.

Serlui Bialtu MLA Pu K. Lalrinthanga pawhin thu sawiin a bial chhung a Tourist Lodge changtlung leh tha tak mai an nei theih tak avangin ram hruaitute chungah bialtu mipuite aiawhin lawmthu a sawi a, Tourist Lodge enkawl tur bik Sawrkarin a lak fel tawh avanga lawmthu sawi telin thawktute pawh rinawm leh thahnemngai taka thawk a, rinawmna leh hawihhawmna nen an mawhphurhna tihhlawhtling thin turin a chah a ni.

Tarlan tawh angin Serlui "B" Tourist Lodge hi April, 2012 a sak tan niin February, 2014 ah zawhfel a ni a, tui leh electric connection tihfel anih lawk theihloh avangin mikhual thlenna tur a hawn hun erawh a tlai ta deuh a ni. Tourist Lodge building len zawng hi 367.90 sq.m niin a plot area hi 2198.81 sq.m a ni a, mikhual thlenna tur Double Room panga, Deluxe Room pahnih leh Dormitory khum paruk awmna a awm bawk a. Room zawng zawng hi Air-Contitioned (AC vuah) vek a ni a, a building hi chhawng li niin a hnuai ber hi Chowkidar quarters a ni a, a hnuai ber dawttu hi Staff quarters a ni a, a chung ber dawttu hi Dormitory niin a chung berah hian Reception, Service Room, Dining Hall, Kitchen (Choka), Double Room panga, Deluxe Room pahnih awmin Tuikhuah thlir theihna tur bathlar nuam tak siam vek ani bawk, heng bakah hian Solar Water Heater dah a ni a, Kangmei phuh rehna hmanrua, parking area zau tak bakah Tourist Lodge atanga Serluin"B" tuikhuah panna step nuam tak siam ani bawk.

Serlui "B" tuikhuah hi Bilkhawthlir khua atanga kilometre 12 a hla ah awmin Aizawl atang chuan kilometre 120 a hla a ni a, Kolasib District chhungah awmin Power & Electricity Department hnuaia 12 megawatt Hydroelectric Power Station awmna ani bawk. A tuikhuah (Dam) pawh hi  Power & Electricity Department hmalakna in kum 2009 khan hawn alo ni tawh a ni.

Tourist Lodge Serlui "B" hi khualzin (tourists) bakah Zoram mipuite, abikin Serlui "B" eh a chhehvel tlawhtuten chawlh hahdam nan leh inhnangfak nan an hman theih tura hawn niin, Serlui "B" Dam leh a chhehvel ah hian Tourism Department chuan khualzin te hip theihna tur hmachhawp hrang hrang a nei mek a, khualzin te tlawh chak leh Zoram hmel timawitu atan theihtawpa chhawm that leh cheimawi a tum a ni.

Nimina  Tourist Lodge Serlui "B" hawnna inkhawm hi Pi Irene Zohlimpuii Chawngthu, Deputy Secretary, Tourism Department in a kaihruai a, Pu Saitluanga, Joint Dorector, Tourism Department in Technical report pe in Pu Biakthanmawia Pautu, Director, Tourism Department in lawmthu sawina hun a hmang a ni. Tourist Lodge hawnna inkhawmah hian Pi Esther Laruatkimi, IRS, Commissioner & Secretary, Tourism Department bakah Aizawl leh Kolasib District a officials te, tlawmngai pawl aiawhte leh thuthar thehdarhtute an tel a ni.