Vawiin khan India ram khawpui lian zualte faina kawnga  inelna Swacch Survekshan 2018 lawmman semna hun chu Indore khawpui Madhya Pradesh-ah neih a ni a. He hunah hian North East States huanga inelnaa Best City of Innovation & Best Practices lawmman dawngtu Biate khaw aiawhin Champhai DC Pu Vanlalngaihsaka, Dr Vanlalchhuanga, MO (Ayush), Nodal Officer Swacch Survekshan Biate leh Pu RV Hluna, VCP Biate ten Ministry of Housing & Urban Affairs changtu Minister Hardeep Singh Puri  hnen atangin chawimawina citation leh momento mawi tak an dawng a ni. 

India ramin faina kawnga hma a sawn zel theihna tura a hmalakna, Ministry of Housing and Urban Affairs buatsaih Swachh Survekshan 2018 kal tlang hian India ram puma khaw 4,041 te chu fai inelna tur hian thlanchhuah an ni a. Mizoram chhung  khawlian zual 23 zingah Champhai District chhunga khawpui lian zual 4:  Champhai,  Khawzawl,  Khawhai leh Biate ten fainna  kawnga tehna hrang hrang,  sorkar laipuiin a siamte hlen chhuah kawngah tan lain he inelna huangah hian an tel a ni.  

Kumin kum tir khan he inelna bika endik hna hi Sawrkar laipui mithiamte chuan an rawn nei a. Swachh Survekshan hi bung thum heng; Service level progress, Direct observation leh Citizen feedback-ah te then hran a ni a. Central atanga mithiam lokal ten endikna leh mipuite hnen atanga zawhna te an rawn nei a ni.