National Institute of Technology Mizoram te chuan nimin tlai khan Mizoram University Auditorium, Tanhrilah Convocation vawi 2-na an hmang a. Mizoram Governor Pu Kummanam Rajasekharan chu Khuallian niin, UPSC Chairman hlui Prof. D.P. Agarwal leh IIT Hyderabad Director Prof. U.B. Desai te Khualzahawm an ni. 

Pu Kummanam Rajasekharan chuan graduation chu zirlaite tana hun lawmawm a nih thu sawiin, bung khat a inkhar rualin bung thar a in tan a ni, a ti a. Zirlaite thawhrimna, tumruhna leh mahni inthununna te chu chhuanawm a tih rualin, an zirtirtute leh an nu leh pa te inpekna chu fakawm a tih thu a sawi a ni. Governor chuan mahni tan chauha nun tum chuan awmzia a neilo tiin, kawng tinrenga hmasawn chhunzawm zel turin a chah a. A khat tawka an thiamnate chu tipunga mahni intuaithar fo turin a chah a ni. Engineer thalai rualte chu an mihringpuite hamthatna atana an thiamnate hmanga, mi harsa zawkte tana eizawnna siamsaktu ni turin a chah bawk a ni.    

Khualzahawm Prof. D.P. Agarwal chuan zirlaite chu khawvel inthlak danglam chak tak karah an awm mek a, India ramin khawvela dinhmun pawimawh tak a luah chho lai hmutute an ni, a ti a. Mi taima, tumruh leh mi inpe te tan chauh hun remchang a in hawng mek a ni, a ti. Hmasawn zel tumna te, fel taka tih duhna te, taimakna leh midang thawhpui theihna ten thui tak a thlenpui tur thu a sawi a. Tum sang leh fel takte nei a, hlawhtlinpui tum turin a chah a ni.   

Prof. U.B. Desai pawhin thu sawiin, zirlaite chu khawvel thiamna thang mek zela thawk hlawk tak ni tura  a duh thu sawiin, India tluka thil thar chin chhuahna hmun remchang a awm loh thu a sawi a ni. Khawvelin harsatna hrang hrang a tawh mek lai hian, a hmel tidanglamtu te zinga thawhtu tangkai tak nia an la dai ngai loh dai ngam turin a chah a ni. Tunlaiah ethics a tlakhniam tawh thu sawiin, thil an tihna reng rengah mi hma leh mi zinga chet dan mawi ching zawm zel turin a chah bawk a ni. India ram ropui tak a nih theih nan, mahni inrintawkna nen tanpui turin a chah a ni.    

Director Prof. Rajat Gupta chuan inlawmna thu sawiin, kum engemawzat kalta chhunga NIT Mizoram hmalaknate a tarlang a ni. 2nd Convocation-ah hian kum 2015-16, 2016-17 leh 2017-18 chhunga zir chhuak mi 171 te hnenah degree pek an ni a. B. Tech-ah mi 165, M. Tech-ah mi 5 leh Ph.D-ah mi 1 te hnenah degree pek an ni.

 

Attachment

  • Loading attachment...