Vawiin chawhnu khan Aizawl District Deputy Commissioner Dr. Franklin Laltinkhuma kaihruaina hnuaia din Joint Inspection Team chuan Rangvamuala National Highway-44A kopang, inhmun atan laih a nih avanga leimin tawlh reng leh zin veivak lirtheite bakah tualchhung mite tana harsatna thlen thintu chu a hmunah kal in an endik a.
He leimin hian chenna-in 6 a tihchhiat tawh bak ah chenna-in 2, chhungkaw 6 chen mekna chu luahzui ngam awm lovin a siam a ni. In 6 chhe tate sak that nan hian in 1 tan Rs. 7,5000/- zel pechhuak turin Sawrkarin hma ala mek a ni.
Rangvamual leimin endiktu te zingah hian Aizawl District Bawrhsap leh a hnuaia thawk official-te, PWD National Highway Division-III a thawk engineer-te leh Geology & Mining Department aiawh te an tel a. Leimin intanna chhan a puh inhmun laitute, Rangvamual Local Council hotute, Rangvamual YMA hruaitute, Leimin in a tihchhiat tak inneitute leh in 2 luah ngamlohva awm mek neitute pawh leimin endikna leh hmalak dan tur sawihona ah hian an tel a ni.
Geologist leh Engineer-te chuan leimin hi a nasa thawkhat a sawiin chawpchilh taka ruahmanna han siam nghal theih a nih loh thu an sawi a. National Highway tana hmun him lo anih vang erawh chuan PWD, National Highway in a siam thatna tur project liantham tak erawh chu a dap angai dawn niin Engineer-te hian an sawi a. He project siam dan tur erawh uluk taka ngaihtuah hmasak ngai leh hmanhmawh taka kalpui chi a nih loh avangin inhmun laitute hian kawng tihfai hna hi an thawh turah an ngai a. Hetiang mimal hmalakna avanga kawngpui chhia siam nan hian PWD in sum an neih loh thu an sawi a ni.
He National Highway 44A hi Aizawl Bawrsap Dr. Franklin Laltinkhuma chuan Lengpui Thlawhna Tumhmun kalkawng chauh a nilova Mizoram mamawh zawng zawng rawn thiarluhna kawngpui a nih avangin a ping thiang lova a tlang reng theih dantur ngaihtuah hmasat phawt a ngaih thu a sawi a. Bawrhsap rawtna angin Lemin endikna na ah hian Joint Inspection Team te chuan meeting nei nghal in hmalakdan a rel a. Meeting thutlukna angin inhmun laitute hi aruala motor pahnih inlehpelh theihna khawpa zauva kawngpui thianfai tur leh a lo min leh a nih pawhin thianfai chhunzawm thin tura hriattir an ni a. Leivung thenfai hna thawk vil tur hian Geology & Mining mithiamte leh PWD National Highway Engineer-te chu mawhphurhna pek an ni. Helai hmun kaltlanga lirtheia tlan tur te chu fimkhur tur leh Traffic Duty bakah vengchhung mite thurawn zawm tura ngen an ni.
