1443/2026-2027 

Dated Serchhip, the 17^th July 2026: Vawiin khan Justice Nelson Sailo, Gauhati High Court Judge leh Mizoram State Legal Services Authority Executive Chairman ni bawk chuan Serchhip District Jail a tlawh a, Jail building leh hmunhmate a  en fiah bakah  Jail-a tang mekte dinhmun enfiahin, an harsatnate a ngaihthlaksak a, tangte mamawh tur thilpekte a hlan bawk. Mizoram State Legal Services Authority Member Secretary Pu Vincent Lalrokima leh Joint Secretary Pu Thomas Lalrammawia te bak-ah Serchhip District Officials - SP, CJM, DLSA Secretary, SDO (Sadar) leh DIPRO ten an tawiawm a ni.

District Jail a tlawhnaah  hian Justice Nelson Sailo chuan mipuite’n dan leh hrai leh mahni dikna chanvote an hriat a pawimawh thu sawiin, harsatna tawkte tan anmahni tanpui tura Legal Services Authority te an awm reng thu a sawi a, dan lam hriatna kawnga harsatna neite chuan an buainate chu Legal Services Authority te hnena thlen nachang hre thin turin a chah bawk.

Justice Nelson Sailo hian vawiin vek khan  Serchhip-a Circuit Court leh Judicial Quarters-te a tlawh nghal bawk a. Ruahman dan chuan naktuk hian Thenzawl Bazar venga  Legal Aid Clinic a tlawh leh bawk dawn a ni.

Legal Aid Clinic hi mipuite'n dan leh hrai kaihhnawha thurawn an lak theihna hmun tur leh harsatna leh mamawhna an neih apianga an pan theih tur hmun a ni a, Clinic pantute lo tanpui tur hian Para Legal Volunteer-te an duty thin a ni.

Tun dinhmunah Serchhip District Jail-ah hian tang mipa 83 leh hmeichhia 10 an vaiin 93 an awm a. ND&PS case - Mipa 16 leh hmeichhia 5, rukruk - Mipa 36 leh hmeichhia 1, MLP Act – Mipa 14 leh hmeichhia 4, POCSO case - Mipa 8, Attempt to Murder – Mipa 1 leh chhan dang avanga tang 8 an awm mek a ni.