Vawiin chawhma dar 11 khan Zo hnam Cultural Meet chu Aizawl-a Vanapa Hall-ah hman a ni a Pu Joseph Lalhimpuia, Parliamentary Secretary chu khuallian niin, he hun hi a hmanpui.

Pu Joseph Lalhimpuia chuan kan hnam inpumkhatna leh inlungrualna tichhe thei anih chuan eng hmasawnna mah hi a hlu tawk lo a ni a ti a. Tunlaiin khawvelin kawng hrang hrangin hma a sawn zel a, Digital world/Computer age-ah hian kan hnam nihna heng- rinawmna, tlawmngaihna, taimakna leh aia upa zahna te hi kan vawng nung thei a, hengte hi thalaite hian kan awmna hmun apiangah kan chawi nun a ngai a ni a ti. Pu Lalhimpuia chuan Hnam hrang hrang an inzawmkhawm avanga vawiina ram ropui tak lo ni ta sawi tur an awm nual a, United Arab Emirates chu kum 1971 ah ram te reuh te te paruk lai inzawmkhawmin an siam a, Germany pawh indopui II-naa ram pahniha inthen chu kum 1990 ah insuihkhawmin German ram ropui tak an lo din leh ta a. Chutiang zel chuan Vietnam leh Yemen te pawh insuihkhawm atang bawka din a ni. Zo hnahthlak thalaite hian insuihkhawm duhna thinlung kan neih phawt chuan ram chhenfakawm tak kan la din thei a ni a ti bawk.

He Zo hnam cultural Meet-ah hian ZoRo General Hqrs President Pu R.Sangkawia pawhin thusawiin Zo hnahthlak te hi ram hrang hrang mel 91000 zeta zauvah kan awm darh a, Mizoram chhungah nuai 10 chuang awrh kan awm a, ram hrang hranga awm te hi belhkhawm chuan Zo hnahthlakte hi nuai 65 bawr vel zet kan ni a ti a. Ram hrang hranga awm Zo hnahthlakte chu rorelna pakhat hnuaia awm a tul thu a sawi bawk.

Zo hnam Cultural Meet 2017 hi ZoRo Thalai General Hqrs leh Aizawl City College Joint Students Union ten an buatsaih a ni a. ZoRo General Hqrs hruaitute bakah Aizawl khawpui chhunga College zirlai engemawzat an tel a, College hrang hrang zirlaiten hnam lam leh zai te an entir bakah Pang, Lai, Mara, Paite, Hmar hlate sak a ni bawk.