Vawiin khan Lawngtlaia Chapchar Kut 2017 hman dan tur relin Organising Committee chu an Chairman Lawngtlai DC Pu H.Dolianbuaia hovin DC Conference Hall-ah an thu khawm.

State leh LADC hnuaia office hotu lute leh tlawmngai pawl ai awhte telna Chapchar Kut Organising Committee chuan Chapchar Kut 2017 chu hman ngei tha a ti a. Kut hman nana thil tul hrang hrangte sawi ho niin, hlung taka hman a nih theih nan ruahmanna siam a ni.

Chapchar Kut hi March 3, 2017 hian Lawngtlai DC office tualah hman tur a ni a. Kut Thlengtu atan Lawngtlai DC leh Kut Pa atan LADC CEM te ni se, tih a ni a. Kut hawnna atan hlado chham chungin tlang tlir a ni ang a, zaipawlin "Kan tlang ram par vulna" tih hla an sa ang. Hemi ni hian hnam lam chi hrang hrang en tur leh hnam zai ngaihnawm tak tak ngaihthlak tur a awm ang a. Ram pum huap zaithiam lar tak tak leh tualchhung zaithiamte pawh sawm tum an ni.

Chapchar Kut Miss thlan leh tum niin, a buaipui turin selection board din a ni a. Hemi atan hian YLA branch tinah lehkha peka an ai awh rawn tir tura ngen tum a ni. Kut hmanna tura thil buaipui tul hrang hrangte lo en zuia bawh zui turin Working Committee din nghal a ni a. A hun a tepter tawh deuh avangin meeting-a telte atangin chanvo leh mawhphurhna insem kual a ni.

Kum danga Lai hnam kut Hlukhla nena Chapchar Kut hman kawp ni thin chu, February ni 24 hian Hlukhla chu a hranga hman a nih dawn avangin kumin hi chuan hman kawp theih a ni dawn ta lo va. Kut hlawhtling tak hman a nih theih nan sawrkar hna thawk leh tlawmngai pawl bakah, mipuite tawiawmna tha tak beisei a ni.