Nimin khan Lawngtlai DC Conference Hall-ah Training on Village Health Sanitation & Nutrition buatsaih a ni a. Lawngtlai CMO Dr Thani Pachuau chu Khuallian a ni.
Khuallian Dr Thani Pachuau chuan mipuite'n hriselna tha zawk an neih theih nana hma lakna chu sawrkarin a ngai pawimawh tak zet a; he lama hma latute pawhin thahnem ngai zawka an thawh a tul a ni, a ti a. Tunlai thiamna sang zelah mi thiamte atanga zirtirna an dawnte hmang tangkai turin kal khawmte a chah.
National Health Mission hnuaia Lawngtlai District chhunga ASHA, Village Health Sanitation Committee leh Nutrition lam buaipuitute puala training buatsaihah hian mipui vantlangin hriselna tha zawk an neih theih dan tur te, chumi atana hma lak dan tur te zir ho a ni a. State ASHA Resource Centre, Aizawla Trainer pathum te'n zirtirna an pe a ni.
Village Health, Sanitation & Nutrition Committee hi Village Council hnuaia Committee peng pakhat, khawtlang huapa din a ni a. Sawrkar hriatpui khua zawng zawnga din tura tih a ni. Report-a tarlan a nih danin, tun dinhmunah Mizoramah sawrkar hriatpui khua 830 awmin, he'ng khuaah te hian Committee hi din vek tawh a ni a. Lawngtlai District bikah khaw 168-ah Village Health, Sanitation & Nutrition Committee hi din a ni.
Tunah hian Mizoram pumah ASHA 1091 an awm mek a; he'ng zinga 178 chu Lawngtlai District chhunga mi an ni. ASHA-te hian nu leh nausen thihna tihtlem kawngah nasa taka hma lain, hriselna lama khawtlang kai harhtu tangkai tak an ni mek a. An hma lakna vang hian nau piang hlim thihna (Infant Mortality Rate) pawh kum dang aiin a tla hniam tih training-ah hian tarlan a ni.
