863/2023-2024

Aizawl, 21st June 2023 : Minister Dr R. Lalthangliana chuan tukin khan Aizawl chhuah lama Manipur atanga raltlante enkawlna hmun hrang hrang a tlawh a. Minister hi Health & Family Welfare Board Vice Chairman Dr ZR Thiamsanga, MLA, Indian Medical Association, Indian Dental Association leh Mizoram Government Doctors' Association leh Central YMA aiawh ten an tawiawm a ni.

Minister hian Thuampui YMA Hall-a raltlan awm mek te a tlawh hmasa ber a, YMA leh Local Council hotuten lo dawngsawngin an dinhmun te an lo hrilh a, Thuampui YMA Hall-ah hian chhungkua 20 awmin an vaiin mi 66 an ni a, naupang 20 an awm bawk a ni. An zingah hian leader inruatin ei rawng an inbawl a ni.

Hemi zawh hian minister hian Tuirial Airfield-a raltlante enkawlna hmun Osborne Moral Reformation Centre a tlawh leh a, raltlante enkawltu Tuirial YMA hruaituten an lo dawngsawng a ni. Turialah hian raltlan 115 awmin chhungkaw 29 an ni a, naupang 70 an awm a, an zinga naupang 7 hi primary school hnaivaiah luh tir an ni. Turiala raltlan awm te hi ei rawng an in bawl chawp a, tui lamah harsatna an tawh avangin anmahni sum sengin tui an lei thin a, an zinga hna thawk thei mi 10 bawr vel hian inhlawhna zawngin am chhuak thin a. Fur khua a hnawng nen thosi atam avangin thosilen an mamawh thu minister hnenah hian an lo thlen bawk a ni.

Minister hian Beraw tlanga raltlan enkawlna hmun pahnih tlawh lehin Art & Culture Multipurpose Complex-a raltlante a kawm a, hetah hian mi 71 awmin an harsatna te minister hnenah hian an lo thlen a. Hemi zawh hian Beraw Convention Centre a raltlan hnuchham awmte a tlawh leh a, hetah Zemabawk YMA leh Local Council hruaituten an lo dawngsawng a, Convention Centre ah hian DMM Children's Home, Churachanpur a hnuchham naupang 28 leh anmahni enkawltu mi 5 an awm a ni. DMM Children's Home enkawltute chuan rinna a Home enkawl an nih thu leh tumah behchhan an nih loh avangin harsatna an tawk tih an sawi a, Churachanpur a an Home awmna chu mi ram an luah hawh a nih avangin a neituten lak let an duh tawh avangin haw leh pawh ni se harsatna an tawk dawn tih an sawi a ni.

Minister hian heng raltlante enkawlna hmun hrang hrang a tlawhna ah hian mamawh zuala an hman turin Rs 5000/- theuh a hlan a, harsatna leh mamawh an neih a hnena an thlen te chu a theih ang anga a bawhzui tur thu in a chhang a. Zirlai naupangte zirna an chhunzawm tir theih rih lohna chhan ber nia an sawi chu tuna an awmna hmun ah hian an awm reng dawn lova an hriat avang leh an awmna tur mumal ruahman a la nih loh vangin an la hlauthawng deuh tih an sawi a ni.

Dr Thangtea hian hnu khar nan Central YMA office tlawhin Transit Camp a tlawh nghal a, Central YMA hotute nen inkawmna hun tha tak hmangin hmalakna tur pawimawh hmasate an sawiho a, Minister hian a tul apianga an hman atan Rs. 10000/- a hlan bawk a, Dr ZR Thiamsanga pawhin a mimal sensovin damdawi thahnem tak raltlante hnenah hian a sem bawk a ni.

Dr R. Lalthangliana chuan kan unaute sahimna zawnga rawn tlanchhiate hi Mizoram sawrkar leh Mizoram mipuiten kan thlahthlam ngai dawn lova, kan tih theih chin chinah kan tang reng ang. An hriselna uluk taka vil reng turin hma kan la char char a, zirna kawnga an bahlah loh nan ruahmanna kan siam mek bawk a ni, a ti a ni.

Minister hian a department enkawl hnuaia mi tho Zoram Medical College (ZMC) in kum khat atana NMC Recognition an hmuh thar thu tarlangin hmasawnna lawmawm tak a ni a ti a. COVID-19 hripui leng leh thildang harsatna tam tak karah hetiang dinhmun kan thleng thei hi a ropui hle a a. Hripui avanga kum 2 chuang lai hna thawk thei lova kan awmna karah ICU khum 13 atanga 50 chuang zeta an pung te, hospital khum 140 atanga 480 lai maia an pung te hi a lawmawm a, mipuite pawhin ZMC hi pan tlakah an ngai a, tunah hian bus te pawh service tir a ni ta a, Civil Hospital lama kan buk lutuk tur te pawh a ziaawm phah a beisei thu Minister hian a sawi bawk.