Naktuka Mizoram puma Kangmei chhuak thei laka invenna hapta hman tan tur denchhena Chief Minister Pu Lal Thanhawla thuchah

Zoram mipui duh takte,

Mizote hun pawimawh bik kan neih zingah Krismas hi a ropui ber a ni ngei ang. Hei lo kum tina ka tawn ve ziah, ka pi-pute atang tawh a hun pawimawh deuh mai kan neih chu lo vah leh hal hun hi ani ve awm e. Lo hal hun chu kan lo thleng leh dawn ta a, mitin kan vah bak ram tikanglo turin kan inchah leh a ni.

Ram lama hnathawk thin kan nih avangin lo vah leh lo hal te hi hunbi nei, kan nuna bet tlat a ni kan ti lo thei lovang.

Kumtinin lo kan nei a, hawpkhawp thal tharchhuah ngei kan tum thin a ni. Lo hal hun pawh uluk tak leh fimkhur takin kan ruat thin. Tun hnu hian lo hal hunbi mumal tak kan nei tawh lova, hei hian nasa takin ram a tikang thin ni te pawhin a hriat a ni.

Fimkhur tawk loh avang leh sorkarin lo hal hun a bituk kan zawm that loh avangin kan vah bak ram a kang chiam chiam thin a; ram a hekin hei hi thil pawi tak a ni. Tin, thal laiin meizial nungchunga paih mai mai te, ninhlei vanga kawng kam hnim hal mai mai te, meichhem timit zet lova kalsan te hian ram zau tak tak a tikang thei a, kan bansan a ngai a ni.

Kan ramngaw a chereu nasa tawh a,tunah chuan ngaw tha tak han sawi tur la awm chhunte pawh ramsa te chenna tur bika humhalh, ‘wildlife sanctuary’ leh khawtlangin ram kan humhalh bik, ‘community reserve’ te tlemte chauh an ni tawh a ni.

Khawvel sik leh sa danglam, ‘climate change’ chak lutuk tihnep nana ramngaw tha a pawimawhzia hi kan hriat belh zel a, ramngaw siam leh humhalh hna pawh kan uar sauh sauh a tul tak zet tawh a ni. Ramngaw atangin thil nung tinrengin kan mamawh boruak tha te, ei tur chaw leh tui in tur te, chenna tur te kan dawng a ni. Mihringte mamawh kan lak rualin a siam lehna lam hi kan ngaipawimawh tur a ni.

Kumina ram kang venna thupui ‘Ram tikangtu chu Ram Hmelma a ni’ tih hi a dik em em a. Naupang atanga puitling, a hmei a pa-in kan mawhphurhna vek a ni. Ram tikanglo turin theihtawp i chhuah theuh ang u.!

Hawh u, Zoram nuam leh mawi siam turin tan ila thar ang u.

Ka lawm e..tiin.