Food, Civil Supplies & Consumer Affairs, Transport leh Tourism Department enkawltu Minister Pu John Rotluangliana chuan vawiin khan Kolasib leh Bairabi a tlawh a. Kolasib ah hian Legal Metrology hnuaia tuialhthei phurtu tank lorry te endikna hmun tur 'Calibration Tower for Testing of Tank Lorry' bunna tur hmun engemaw zat Department in lo thlithlai te chu a hmunah kalin Department officer te nen an en hova. Heng hmun an en atang hian a hmun rem an la thlang leh dawn a ni. Hemi hnu hian Bairabi panin rel kawng siam mek leh Bairabi Rel station te a tlawh leh a ni.
Bairabi Tourist Lodge ah Pu John Rotluangliana chu khawtlang leh tlawmngai pawl hruaitute ten an lo dawng sawng a. Inkawmna hun tawite an nei nghal a, khawtlang hruaitu ten an mamawh neihte a hnenah an thlen a ni.
Supply Minister Pu John Rotluangliana chuan Food Security Act chungchang sawiin Food Security Act hmang turin Sawrkar chu a inpeihfel tawh a, a tlangzarhna hi February ni 25 ah neih kan beisei a. March thla atangin kan hmang tan dawn a, Mizoram mihring 7,06,000 vel a huam dawn a ni, a ti a. Food Security Act hi mipui tan malsawmna anih rualin ram tan thil chenfak awm tak a ni a. VIP quota te, pawl leh mimal hnenah buhfai permit pek thin te tihtawp anih avangte leh Food Security Act kan hman tan dawn avangin Sawrkar chuan thla tin cheng vaibelchhe 7 atanga vaibelchhe 8 vel sum kan hum thei dawn a ni, a ti. Road Safety Week hmanlai mek chungchang pawh sawiin Transport Minister chuan Mizoram ah lirthei a tam tawh em avangin lirthei khaltu ten an mahni leh midang himna atan traffic rules an hriatchian leh an ngaihpawimawh a tul thu a sawi a. Lirthei khalhtute a tam zawk hi hawihawmna lamah kan tlachham niin a lang fo thin a, motor khalhtu reng reng te hi polite hreh loh ila chutia kan tih chuan midang tan entawntlak kan ni thei a ni, a ti. Lirthei chetsualna tam zawk chu a khalhtu te fimkhur tawk loh vang a ni fo a tiin zu leh motor khalh hi thil inhmeh loh ber nia a hriat thu a sawi bawk.
Hemi hnu hian Transport Minister chuan Bairabi Rel Station a tlawh leh a. North East Frontier Railway hotuten an hma lak tawh chin te hrilhin March thla chhunga Bairabi Rel Station a bungraw phur rel (broad gauge) tlan luh tir an beisei thu an hrilh a. Passenger train chungchanga Minister zawhna chhangin railway hotute te chuan March thlaa bungraw phur rel a tlan hnu leh Commissioner of Railway Safety in helai hmun a endik hnu chuan passenger train (broad gauge) chu Bairabi ah March thla tawp lam emaw April thla tir lamah emaw a luh ngei an beisei thu an sawi a. Hna hi chhun zan zawma an thawh mek thu Minister hi an hrilh bawk a ni.
Pu John Rotluangliana chuan Bairabi kaia Tlawng lui chunga lei dawh mek a tlawh bawk a, he lei hi an dawh zawh hunah Mamit District leh Kolasib District ten hmasawnna rahbi thar an kai dawn a, mipui lam pawhin nasa takin an chhawr thei dawn a ni, a ti a. Hnathawktu te chu an hma bak te zawtin he hna zawhfel hi mipui an nghakhleh thu a hrilh a. Lei dawhtu ten April thlaah hnazualpui chu zawh an beisei thu Minister an hrilh a ni.
Minister hi Pu Hrangtawna, Commissioner & Secretary, Transport leh F, CS &CA Department; Pu Andrew H. Vanlaldika, Joint Director, F,CS &CA Department leh Joint Controller, Legal Metrology Department leh Kolasib a Department thenkhat hotulu ten an tawiawm a ni.
