Deputy Commissioner Siaha leh Deputy Commissioner Lawngtlai te tang kawp bul tumin Kolodyne Music Festival 2020 (KMF-2020) chu a tum khat nan Siaha leh Lawngtlai District ramri Kawlchaw khaw bula Chhimtuipui (Kolodyne) lui kamah nimin leh vawiin khan buatsaih a ni.

Nimin chawhnu lama he Festival hawnna hunah Lawngtlai DC Pi Shashanka Ala, IAS chuan hawnna thu sawiin, Festival hlawhtling tak buatsaih a nih theih nana hma latu Organising Board member te, sum leh paia tanpuitu (sponsor) hrang hrangte, zai thiam leh hnam lam entirtute, a dawltu Kawlchaw khawtlang leh mipui pung khawm zawng zawng chungah lawm thu a sawi a. Festival chu Chhimtuipui area-a mite a tha zawnga suih khawma ke pentirtu atana buatsaih a nih thu sawiin, Festival thupui pathum - bawlhhlawh siam lo zawnga khawsak (#ZeroWasteManagement) zir tur te, ruihhlo laka inthiar fihlim (#SayNotoDrugs) tur leh plastic lam chi hmang tam lo (#SayNotoPlastic) tur te'n kal khawmte chu a chah a ni.

Siaha DC Pu Bhupesh Chaudhary, IAS pawhin thu sawiin, a tira an suangtuahnaa mi tuna a taka hmuh theih a lo ni ta leh mipuiin an hlutpui em em chu lawmawm a tih thu sawiin, an buatsaih chhan a hlawhtlin ngei a beisei thu a sawi a. Mipuite chu hlim taka hun hman chhunzawm turin duhsakna a hlan.

He Kolodyne Music Festival hi district pahnih - Siaha leh Lawngtlai mipuite tana buatsaih niin, Organising Board-ah pawh district pahnih atangin ai awh eng emaw zat indah ve ve a ni a. Ni hnih (February ni 7 & 8) awh tura duan a ni a. Sawrkar department, LADC, MADC leh mimal sumdawng atang te'n sponsorship hmuh niin, Mizoram pum huapa zaithiam lar - Magdalene, Shai Hills, G'Nie, Fiona Pachuau, Kimkima leh Francis te bakah, tualchhung zaithiam - John Beizachhi Phuto, Silver Flame(Tipa), Young Lai Music, Ade, Suzerain, Lone Sister, Mercy, Jessica B Khuhly, Sharon, Holy Grail, Asylum, Kurapia, John Manaha, Project KMF Band leh Lunglei atangin Assam Rifles Band te inlanin, Siaha Meisavaih 'W' Branch MTP leh Lawngtlai College Veng Branch YLA te'n hnam lam an entir bawk.

He Festival-ah hian music concert bakah, ei tur leh hnam thuam chi hrang hrang zawrhna stall hawn niin, a duh tan Chhimtuipuiah lawnglenga chuan theihna tur buatsaih a ni a. Luia che sual an awm loh nan Kawlchaw W Branch YMA leh Kawlchaw E Branch MTP te an duty reng bawk.

He Festival pual hian Facebook account www.facebook.com/kmf2020 leh Instagram account kolodynemusicfestival te pawh siam a ni.

Attachment

  • Loading attachment...