Vawiin chawhnu  khan Law & Judicial, Transport, Forest leh Parliamentary Affairs changtu Minister Pu TJ Lalnuntluanga chuan Champhai District Court awmna tur hmunhma CHANEM Building leh District Transport Office-te tlawhin official leh thawktute nen inrawnkhawmna leh hmalak dan turte an sawiho.

I&PR Conference Hall, CHANEM-a inrawnkhawmna hun hmannaah thusawiin  Pu TJ Lalnuntluanga chuan Judiciary chu mipui sawrkar siam rama hmun pawimawh tak chang anih thu leh hmunhma pawimawh leh pan awlsam tak mamawh anih thu a sawi a. Mizoram sawrkar Chief Minister kaihhruai Cabinet meeting-in Champhai District Court  hmunhma tur tha tak a ruahmansak chu lawmawm a tih thu a sawi a. District Court  nuam leh changtlung tak din tura chak taka hmalak a ni a, District dangahte pawh hmalak zel a ni, a ti bawk. 

He hunah hian Pu Zahmingthanga, Joint Secretary, Law & Judicial Department pawhin thusawiin, Law Minister viak tha tak hmalakna a Court hmunhma leh mamawhte buaipui zel anih thu a sawi a. Pu R.Vanlalena, Addl Session Judge, Champhai pawhin Court   mamawh leh hmalak dan tura ruahmnnate a sawi a. Pi Zonunpari Chhangte, Architect, PWD hnen atangin report ngaihthlak a ni. 

Transport Minister hian District Transport Office, Champhai pawh tlawhin DTO Pu K.Lalhmuakliana leh Staff-ten an lo dawngsawng a. Minister chuan DTO Champhaiah Pollution Test-na khawl bun fel thuai tum anih thu sawiin, District Office hmachhawp leh mamawhte bawhzui zel anih thu a sawi bawk. Minister hi Pu R. Lalrammawia, Transport Director chuan a tawiawm a ni.